Tħejjija għall-futur tal-ħiliet

Sabiex jikseb għarfien dwar x’jaħsbu n-nies fuq il-mod li bih id-dinja tax-xogħol qed tinbidel, Deloitte riċentament wettaq Stħarriġ dwar il-Forza tax-Xogħol Ewropea. L-istudju fuq 15-il xahar stħarreġ aktar minn 15,000 persuna minn madwar 10 pajjiżi Ewropej. Hawnhekk ġbarna fil-qosor is-sejbiet ewlenin.

Il-maġġoranza tal-ħaddiema jaraw l-impatt tal-bidla teknoloġika bħala wieħed pożittiv.

Deloitte sab li l-ħaddiema huma b’mod ġenerali pożittivi dwar l-impatt tal-bidla teknoloġika fuq il-ħiliet:

• 51 % tal-ħaddiema jemmnu li fi żmien 10 snin, l-awtomatizzazzjoni se ttejjeb il-kwalità ta’ xogħolhom;
• 50 % jemmnu li l-awtomatizzazzjoni tagħtihom l-opportunità li jiżviluppaw ħiliet ġodda;
• 48 % jħossu li l-awtomatizzazzjoni se tagħmilhom aktar produttivi;
• 24 % biss jemmnu li l-awtomatizzazzjoni se twassal biex ix-xogħol tagħhom jibda jitqies żejjed;
• 26 % biss jgħidu li l-awtomatizzazzjoni se tnaqqas is-sigurtà tax-xogħol tagħhom.

Meta jitqies il-livell tal-edukazzjoni, il-ħaddiema b’livelli ogħla huma aktar pożittivi dwar l-impatt tat-teknoloġija filwaqt li l-ħaddiema b’livelli aktar baxxi għandhom opinjoni aktar negattiva.

Il-maġġoranza tal-ħaddiema jħossuhom ippreparati għall-futur

Kważi 90 % tal-ħaddiema jemmnu li huma “ppreparati sa ċertu punt” jew “ippreparati sew” għall-futur.

F’termini ta’ profiċjenza fl-oqsma tal-ħiliet ewlenin:

• 52 % jħossu li huma diġà profiċjenti fil-ħiliet avvanzati tal-IT (bi 23 % jiddikjaraw li jkollhom bżonn itejbu l-ħiliet eżistenti tagħhom);
• 45 % diġà għandhom livell għoli ta’ għarfien tekniku (b’20 % li għandhom bżonn itejbu l-ħiliet eżistenti tagħhom);
• 38 % diġa’ għandhom livell għoli ta’ ħiliet ta’ tagħlim (bi 19 % li għandhom bżonn itejbu l-ħiliet eżistenti tagħhom).

Il-ħaddiema jaraw lilhom infushom bħala aktar ippreparati għall-iżviluppi li jirriżultaw minn teknoloġiji emerġenti minn atturi oħra:

• 26 % jemmnu li huma ppreparati sew;
• 22 % jemmnu li l-impjegatur tagħhom huwa ppreparat sew;
• 19 % jemmnu li s-settur tagħhom huwa ppreparat sew;
• 14 % jemmnu li l-gvern/istituzzjonijiet politiċi huma ppreparati sew.

Il-maġġoranza tal-ħaddiema jemmnu li l-miżuri tal-politika għandhom jiffukaw fuq l-edukazzjoni u t-taħriġ

Meta mistoqsija dwar il-miżuri differenti li l-gvern jista’ jibda, il-ħaddiema jagħtu l-akbar prijorità lill-edukazzjoni u lit-taħriġ:

• 52 % tal-ħaddiema jemmnu li l-miżuri tal-politika għandhom jagħtu prijorità lit-titjib tad-disponibbiltà tat-taħriġ vokazzjonali;
• 52 % iħossu li l-miżuri għandhom jagħtu prijorità lit-titjib tal-edukazzjoni sekondarja;
• 46 % jemmnu li l-miżuri għandhom jagħtu prijorità lit-titjib tal-aċċess għat-teknoloġija l-ġdida;
• 42 % jiddikjaraw li l-miżuri għandhom jagħtu prijorità lit-titjib tal-edukazzjoni universitarja;
• 21 % biss jemmnu li l-miżuri għandhom jagħtu prijorità lir-restrizzjoni tal-użu tat-teknoloġiji li jpoġġu l-impjiegi f’riskju.

Meta wieħed iħares lejn il-livell ta’ edukazzjoni, dawk il-ħaddiema b’livelli aktar baxxi ta’ edukazzjoni huma aktar probabbli li jappoġġaw restrizzjoni fuq teknoloġiji ġodda.

Konklużjonijiet u rakkomandazzjonijiet ewlenin

• Il-maġġoranza tal-ħaddiema diġà lesti jħaddnu l-potenzjal tat-teknoloġija. Dan huwa kontra dak li normalment jingħad, li l-ħaddiema jibżgħu mill-bidla teknoloġika u huma reżistenti għaliha. Deloitte jirrakkomanda li dawk li jfasslu l-politika għandhom isibu mod kif jinvolvu lill-ħaddiema fil-proċess ta’ tranżizzjoni, u li l-awtoritajiet pubbliċi għandhom jiffukaw fuq l-iżvilupp ta’ narrattiva pożittiva madwar ir-rivoluzzjoni diġitali (eż. il-potenzjal tat-teknoloġija li toħloq l-impjiegi).
• Ħaddiema b’ħiliet ta’ livell baxx jirriskjaw li jitħallew l-art sakemm ma titteħidx azzjoni adegwata. L-impjegati b’livell għoli ta’ kisba edukattiva huma aktar ottimisti dwar il-futur tax-xogħol minn dawk b’livell aktar baxx. Deloitte jirrakkomanda li l-gvernijiet għandhom jieħdu azzjoni biex jiżguraw li kulħadd ikun konxju mir-realtajiet tal-Industrija 4.0 u ppreparat għalihom, b’mod partikolari bl-użu ta’ miżuri ta’ politika mfassla apposta biex jgħinu lil dawk li huma l-aktar f’riskju li jitħallew l-art.
• Il-ħaddiema jistennew li l-gvern jagħti eżempju u jipprovdi qafas ġenerali. Il-fatt li perċentwal għoli ta’ ħaddiema jħossu li huma ppreparati għall-futur jissuġġerixxi li xi wħud jaf qegħdin jissottovalutaw l-impatt tal-bidliet futuri u li hemm nuqqas ġenerali ta’ għarfien dwar il-bżonn li l-ħiliet jittejbu u li jingħata taħriġ mill-ġdid. Deloitte jirrakkomanda li l-gvernijiet u l-awtoritajiet pubbliċi għandhom jipprovdu informazzjoni lill-ħaddiema u jagħtu eżempju pożittiv billi jadottaw teknoloġiji ġodda.
• Il-gvernijiet għandhom jipprovdu l-aħjar ambjent għall-partijiet ikkonċernati biex jindirizzaw il-lakuni fil-ħiliet. Filwaqt li l-ħaddiema jemmnu li l-politiki dwar l-edukazzjoni u t-taħriġ għandhom jingħataw prijorità, huma jħossu wkoll li l-provvediment tat-taħriġ huwa fil-biċċa l-kbira tiegħu r-responsabbiltà tal-impjegaturi u mhux tal-awtoritajiet pubbliċi. Deloitte jirrakkomanda li l-kumpaniji għandhom imexxu t-tranżizzjoni teknoloġika billi jistabbilixxu kultura ta’ tagħlim u l-gvernijiet għandhom jinvestu fl-ETV u fit-tagħlim tul il-ħajja.

Aktar informazzjoni dwar l-Istħarriġ dwar il-Forza tax-Xogħol Ewropea 2019 u s-sejbiet ta’ Deloitte tinsab fuq is-sit web ta’ Deloitte Insights.

 

Links relatati:

Deloitte Insights

 

Aqra aktar:

Il-Jiem Ewropej tal-Impjiegi

Drop’pin@EURES

Sib il-Persunal tal-EURES..

Il-kundizzjonijiet tal-għajxien u tax-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li għadhom se jsiru

Il-EURES fuq Facebook

Il-EURES fuq Twitter

Il-EURES fuq LinkedIn