Ideat u Suġġerimenti

L-Ewropej li jimpjegaw jistgħu jużaw diversi servizzi u għodda ta’ komunikazzjoni sabiex jippubblikaw il-postijiet tax-xogħol battala tagħhom. Il-lista ta’ hawn taħt tagħti ħarsa lejn is-sorsi ta’ informazzjoni li għandek disponibbli fil-livell Ewropew.

SERVIZZI TA’ IMPJIEG PUBBLIKU U L-PORTAL TAL-EURES GĦALL-MOBILITÀ TAL-IMPJIEGI

• Żur l-uffiċċju tal-impjiegi lokali jew reġjonali tiegħek għal pariri. Dawn jista’ jkollhom Konsulent tal-EURES li jista’ jipprovdilek għajnuna aktar personalizzata.
• Il-konsulenti tal-EURES jistgħu jagħtu pariri dwar opportunitajiet ta’ xogħol fis-suq tax-xogħol Ewropew, jirreferuk għal impjegaturi potenzjali u jipprovdu informazzjoni dettaljata dwar il-ħajja u x-xogħol barra l-pajjiż.
• Attendi preżentazzjonijiet ta’ min iħaddem, workshops dwar is-snajja’ u ħiliet u fieri tal-impjiegi organizzati mill-EURES f'pajjiżek. Id-dettalji ta’ avvenimenti fuq livell Ewropew jistgħu jiġu kkonsultati fil-"Kalendarju tal-Avvenimenti" fuq il-paġna prinċipali (homepage) tal-portal tal-EURES.
• Mezz ieħor utli li jservi tal-ewwel għajnuna sabiex issir taf aktar dwar il-kundizzjonijiet tal-ħajja u tax-xogħol f’pajjież ieħor taż-ŻEE huwa s-sezzjoni "Ħajja u Xogħol" tal-portal tal-EURES. Din tipprovdi informazzjoni dettaljata għal kull pajjiż.
• Fittex għal postijiet tax-xogħol battala tal-EURES fi kwalunkwe pajjiż taż-ŻEE permezz tal-funzjoni "Fittex impjieg" fuq il-portal tal-EURES. Għandek aċċess għal postijet tax-xogħol battala aġġornati fil-ħin reali f’31 pajjiż Ewropew, li jkopru firxa wiesgħa ta’ impjiegi, inklużi opportunitajiet ta’ xogħol permanenti u staġjonali. Il-postijiet tax-xogħol tal-EURES li huma miftuħa espliċitament għar-reklutaġġ transnazzjonali huma mmarkati bħala "Ewropej".
• Il-funzjoni "EURES Fittex impjieg" għandha interface ta’ tfittxija simplifikata u faċli biex tintuża. Dawk li jfittxu x-xogħol jistgħu jagħżlu, per eżempju, pajjiż, reġjun, professjoni, tip ta’ kuntratt jew jikkombinaw diversi kriterji sabiex isibu impjieg. Din hija disponibbli fil-25 lingwa taż-ŻEE.
• Il-postijiet tax-xogħol battala ippubblikati fil-portal tal-EURES huma, fil-parti l-kbira tagħhom, importati direttament mid-databases nazzjonali tal-postijiet tax-xogħol battala. B’mod ġenerali, it-titolu u d-deskrizzjoni tal-post tax-xogħol biss huma miktuba fil-lingwa nazzjonali tal-pajjiż sors. Dettalji oħrajn dwar il-post tax-xogħol, bħat-tip ta’ kuntratt, l-esperjenza u l-livell ta’ edukazzjoni meħtieġa eċċ. sikwit jiġu tradotti.
• Ta’ min ikun jaf li kull min iħaddem jiddeċiedi hu b’liema lingwa jrid li l-avviżi tal-postijiet tax-xogħol battala tiegħu jiġu ppubblikati fis-sezzjoni "EURES Fittex impjieg". Jekk min iħaddem ikun partikolarment interessat fir-reklutaġġ internazzjonali, l-avviż tal-post tax-xogħol battal jista’ jiġi ppubblikat f’lingwa waħda jew f’diversi lingwi differenti mil-lingwa nazzjonali ta’ min iħaddem.

ORGANIZZAZZJONIJIET INTERNAZZJONALI

• Il-postijiet tax-xogħol battala f'istituzzjonijiet pubbliċi nazzjonali u internazzjonali jiġu ppubblikati fuq il-websajts rispettivi tagħhom. Jekk jogħġbok innota li għall-maġġoranza tal-impjiegi fl-amministrazzjoni pubblika trid tgħaddi minn testijiet jew eżamijiet sabiex titpoġġa f’lista provviżorja minn fost l-applikanti oriġinali. Jekk tikklikkja fuq "Links" fil-kaxxa ta’ fuq tal-paġna tal-portal EURES, issib lista estensiva ta’ organizzazzjonijiet u istituzzjonijiet fejn tista’ ssib ukoll informazzjoni u opportunitajiet ta’ xogħol.
• L-offerti ta’ xogħol mill-istituzzjonijiet Ewropej mhumiex disponibbli fuq il-portal tal-EURES. Dawn jiġu ppubblikati fuq il-websajt tal-Uffiċċju Ewropew għall-Għażla tal-Persunal (EPSO).

AĠENZIJI PRIVATI GĦALL-IMPJIEG U AĠENZIJI TA’ REKLUTAĠĠ

• F’ħafna Stati Membri, hemm aġenziji privati tal-impjieg li huma mmirati speċifikament għat-tiftix ta’ xogħol temporanju barra l-pajjiż. Bl-istess mod, l-aġenziji privati tar-reklutaġġ f’pajjiżek jew barra l-pajjiż jistgħu joffru firxa vasta ta’ informazzjoni. Dawn jiggwidawk fil-proċeduri tal-applikazzjoni u jgħinuk tifhem ir-rekwiżiti legali marbuta mar-rilokazzjoni. Qabel tużahom, ara jekk humiex irreġistrati kif suppost u jekk jitolbux ħlas għas-servizzi tagħhom. Iċċekkja wkoll in-natura tal-kuntratti tax-xogħol illi joffru.

SORSI OĦRAJN TA’ INFORMAZZJONI

• Fittex avvenimenti rilevanti jew postijiet tax-xogħol battala oħrajn għal gradwati fuq websajts speċjalizzati jew permezz ta’ magni ta’ tfittxija fuq l-internet (pereżempju Google u Yahoo), gazzetti nazzjonali, pubblikazzjonijiet speċjalizzati (eż. magażins ta’ gwida għall-karriera) u wkoll permezz taċ-ċentru tal-karrieri tal-università jew assoċjazzjoni/unjin tal-istudenti. Il-libreriji pubbliċi ewlenin normalment jirċievu gazzetti u pubblikazzjonijiet barranin fuq bażi regolari. Tista’ tikkonsulta wkoll il-link "Informazzjoni u impjiegi għall-gradwati" f’"Links Relatati" fejn tista’ ssib ħafna indirizzi elettroniċi utli fiż-ŻEE.
• Li tqatta’ xi żmien fil-pajjiż tal-għażla tiegħek fuq apprendistat jew perjodu ta’ xogħol huwa mod ideali ta’ kif issir taf il-pajjiż u jkollok l-opportunità li tfittex postijiet tax-xogħol fuq il-post. Ħafna kumpaniji kbar jorganizzaw tali perjodi ta’ xogħol. Fittex opportunitajiet ta’ apprendistat fil-link "Informazzjoni u impjiegi għall-gradwati".
• Sa issa inti qrajt xi pariri dwar kif tista’ ssib opportunità ta’ karriera bħala impjegat. Qatt ikkunsidrajt il-possibbiltà li tibda negozju fi Stat Membru ieħor? Taf dwar il-proġett pilota ġdid tal-Kummissjoni Ewropea ERASMUS għal imprendituri żgħażagħ? Din l-iskema ta’ mobilità hija mmirata sabiex tiffaċilita t-taħriġ (1-6 xhur barra), in-netwerking u l-iskambju tal-esperjenzi fost imprendituri żgħażagħ permezz ta’ apprendistat f’impriżi żgħar u ta’ daqs medju fi Stat Membru ieħor tal-UE.

• Kif l-aħjar inqabbel il-ħiliet tiegħi ma’ post tax-xogħol battal barra l-pajjiż Il-gradwati li jkunu qegħdin ifittxu x-xogħol b’mod ġenerali u, b’mod partikolari, dawk l-istudenti b’inqas opportunitajiet fis-suq tax-xogħol, għandhom ikunu flessibbli u jadattaw irwieħhom għall-opportunitajiet ta’ xogħol. Ikkunsidra l-kompetenzi personali tiegħek u r-rieda tiegħek li titgħallem ħiliet ġodda – aħseb fit-twemmin fik innifsek, u emmen fil-kapaċitajiet tiegħek! Ħafna drabi dawk li jħaddmu ma jkunux interessati fid-diplomi jew l-oqsma ta’ studju tiegħek daqskemm ikunu interessati fil-kapaċità tiegħek li tieħu r-responsabbiltà u tagħmel xogħlok tajjeb.
• Il-kwalifiki akkademiċi u professjonali tiegħi sejrin jiġu rikonoxxuti? Wieħed mill-elementi l-aktar importanti huwa li ssir taf kif il-kwalifiki tiegħek jiġu rikonoxxuti fil-pajjiż li jospitak u wkoll jekk il-professjoni hijiex regolata jew le. Professjonijiet regolati Il-professjonijiet regolati huma dawk il-professjonijiet li huma ristretti għal persuni li għandhom ċerti kwalifiki (pereżempju avukati, kontabilisti, għalliema, inġiniera, paramediċi, tobba, dentisti, kirurgi veterinarji, spiżjara u periti). Fi wħud minn dawn il-professjonijiet, ġiet stabbilita lista ta’ kwalifiki rikonoxxuti u ekwivalenti. Professjonijiet mhux regolati F’xi professjonijiet oħrajn huwa biss min iħaddem li jiddeċiedi jekk kandidat huwiex kapaċi jagħmel ix-xogħol jew le. L-ekwivalenza tiġi ġġudikata fuq bażi ta’ każ b’każ, billi jittieħdu f’kunsiderazzjoni t-tul u l-kontenut tal-kors. F’dan il-każ, tista’ tibda tipprattika malli jkollok ix-xogħol, iżda għandek tosserva kwalunkwe proċeduri neċessarji applikabbli għal dik il-professjoni fil-pajjiż li jospita – li jista’ jkun differenti minn dak li inti mdorri bih. Rakkomandazzjoni li tistabbilixxi l-Qafas Ewropew tal-Kwalifiki għat-tagħlim tul il-ħajja (EQF) kienet iffirmata b’mod formali f’April 2008 mill-Parlament Ewropew u l-Kunsill flimkien. Il-Qafas Ewropew tal-Kwalifiki (EQF) jaġixxi bħala strument ta’ traduzzjoni biex jagħmel il-kwalifiki nazzjonali aktar leġibbli madwar l-Ewropa, jippromwovi l-mobilità tal-ħaddiema u ta’ dawk li qegħdin jitgħallmu bejn il-pajjiżi u jiffaċilita t-tagħlim tagħhom tul il-ħajja. Mill-2012 ‘il quddiem, il-kwalifiki kollha għandhom jibdew iġorru referenza għall-EQF, biex b’hekk dawk li jħaddmu u l-istituzzjonijiet ikunu jistgħu jidentifikaw l-għarfien tal-ħiliet, l-abbiltajiet jew il-kompetenzi ta’ kandidat. Sir af aktar dwar ir-rikonoxximent tal-kwalifiki akkademiċi – ara l-link 'NARIC' f’'Suġġetti Relatati' fis-sezzjoni "Inti gradwat?" u s-sezzjoni EQF fuq il-portal Europa.
• Il-lingwa hija problema jew le? Meta tfittex xogħol f’pajjiż ieħor, li tkun taf titkellem il-lingwa lokali huwa ovvjament ta’ vantaġġ (u jista’ jkun neċessarju). Ħiliet bażiċi fil-lingwa Ingliża huma ħafna drabi ta’ benefiċċju kbir. Madankollu, il-ħiliet lingwistiċi meħtieġa jistgħu jkunu differenti minn xogħol għal ieħor jew minn pajjiż għal ieħor u ma hemm ebda regola ġenerali li hija applikabbli. Madankollu, xorta għandek tikkunsidra li tirreġistra għal kors tal-lingwa sabiex ittejjeb l-għarfien jew il-livell ta’ profiċjenza tiegħek f’dik il-lingwa.
• Nista’ nżomm id-drittijiet tal-benefiċċji tal-qgħad fil-pajjiż ta’ oriġini tiegħi waqt li nkun qiegħed infittex xogħol fi Stat Membru ieħor taż-ŻEE? Jekk bħalissa tinsab bla xogħol u trid tfittex xogħol f’pajjiż ieħor taż-ŻEE, tista’ tittrasferixxi l-benefiċċji tal-qgħad tiegħek għal 3 xhur. Madankollu, hemm regoli u kundizzjonijiet stretti li jikkonċernaw it-trasferiment tal-benefiċċji. Ikkuntattja s-servizz tal-impjieg lokali jew l-aġenzija xierqa dwar il-benefiċċji qabel ma tieħu azzjoni. Jekk għadek ma sibtx xogħol wara 3 xhur, tista’ tintalab biex titlaq, għalkemm l-awtoritajiet jistgħu jkunu laxki jekk tipprova li għandek possibbiltajiet tajbin li ssib xogħol. Is-sezzjoni "Ħajja u Xogħol" fuq il-portal tal-EURES fiha aktar informazzjoni utli dwar dan.
• X’dokumenti legali jkollok bżonn normalment sabiex tmur barra l-pajjiż? Iċċekkja ferm minn qabel li għandek karta tal-identità valida jew passaport validu sabiex tkun tista’ tmur tgħix fiż-ŻEE. Fittex informazzjoni ċara dwar ir-rekwiżiti tal-viża u/jew tal-permess tax-xogħol jekk ... - hemm miżuri transizzjonali għad-dritt tal-moviment ħieles tal-ħaddiema li japplikaw għal pajjiżek. Għal aktar dettalji kkonsulta s-sezzjoni "Ħajja u Xogħol" fuq il-portal tal-EURES, jew Konsulent tal-EURES lokali tiegħek; - tixtieq taħdem barra ż-ŻEE (ikkuntattja l-Ambaxxata rilevanti tal-pajjiż mhux membru taż-ŻEE f’pajjiżek għal dettalji dwar il-proċess tal-applikazzjoni).
• X’jiġri jekk minix ċittadin tal-UE? Is-servizzi tal-EURES fuq l-internet huma disponibbli b’xejn għal kull utent li għandu aċċess għall-internet. Jekk inti diġà qiegħed/qiegħda tgħix u taħdem fit-territorju taż-ŻEE jew fl-Iżvizzera, tista’ tikkuntattja Konsulent lokali jew reġjonali tal-EURES sabiex tieħu pariri. Madankollu, li ssib xogħol permezz tal-EURES ma jbiddilx l-obbligi legali u l-proċeduri amministrattivi li jistgħu jkunu applikabbli għal ċittadini mhux tal-UE. Jekk għandek il-ħsieb li titlaq minn pajjiż mhux membru taż-ŻEE (għajr l-Iżvizzera) biex tmur tgħix u taħdem fiż-Żona Ekonomika Ewropea jew fl-Iżvizzera, il-Ministeru tal-Affarijiet Barranin ta’ pajjiżek sikwit ikun jista’ jipprovdilek informazzjoni dwar rekwiżiti legali sabiex tmur tgħix barra jew jirreferik għal ċentri ta’ informazzjoni utli.

Kif tapplika?

• Iddefinixxi pjan dwar il-karriera Iddefinixxi pjan ċar dwar il-karriera, ibbażat fuq il-kwalifiki, il-kapaċitajiet u l-preferenzi tiegħek: it-tip ta’ xogħol u kumpanija, ħiliet, kompiti u responsabbiltajiet li tixtieq li jkollok. Sabiex tagħmel dan, ipprova eżerċizzju ta’ sejbien ta’ xogħol billi tuża l-magna tar-riċerka u/jew funzjoni ta’ tiftix permezz ta’ kelma ewlenija fis-sezzjoni "EURES fittex impjieg" ta’ dan il-portal. Qabbel il-profil tiegħek mad-deskrizzjonijiet tax-xogħol fl-oqsma li inti interessat fihom.
• Applikazzjoni tax-xogħol immirata Ibgħat l-applikazzjoni tiegħek għall-postijiet tax-xogħol battala li ttellgħu fuq dan il-portal jew fuq websajts oħrajn, jew li ġew ippubblikati f’gazzetti, rivisti, eċċ. F’dawn issib informazzjoni fuq kif tapplika u lil min għandek tikkuntattja. Ħafna kumpaniji għandhom is-siti ta’ reklutaġġ tagħhom fuq l-internet, fejn inti tista’ xi kultant tissottometti applikazzjoni elettronika.
• Is-CV tal-EURES onlajn Billi tirreġistra b’xejn fl-"EURES Tiegħi" għal dawk li qegħdin ifittxu x-xogħol, inti tista’ toħloq is-CV tiegħek u tpoġġih għad-dispożizzjoni tal-persuni rreġistrati li jimpjegaw kif ukoll għall-Konsulenti tal-EURES li jgħinu lil dawk li jħaddmu sabiex isibu l-kandidati addattati. Il-kuntatt jista’ jsir ukoll jew ma’ Konsulent tal-EURES li jipproċessa l-applikazzjoni jew inkella, f’xi każijiet, ma’ min iħaddem direttament.
• Applikazzjoni spontanja għax-xogħol Ovvjament tista’ wkoll tipprepara u tibgħat applikazzjonijiet spontanji (ftakar li bosta postijiet battala ma jiġux ippubblikati minn min iħaddem). Ħafna websajts iddedikati għall-gradwati joffru pariri u gwida dwar is-CVs u l-applikazzjonijiet spontanji. Il-proċedura l-aktar komuni hija li tibgħat CV immirata mehmuża ma’ ittra ta’ kopertura lil dawk li jħaddmu li tkun għażilt minn qabel.

Kif tikteb Curriculum Vitae?

• CV tal-Europass Preferibbilment għandek tuża l-format tas-CV Ewropew, għal komparabbiltà eħfef tal-kwalifiki u l-esperjenza tiegħek madwar il-pajjiżi taż-ŻEE. Dan il-format tas-CV huwa attwalment disponibbli fil-lingwi kollha taż-ŻEE fis-CV tal-EURES onlajn u huwa addattat kemm għall-gradwati vokazzjonali kif ukoll għal dawk akkademiċi. Is-CV tal-Europass tagħti stampa ċara tax-xejra u l-ħiliet tal-kandidat madwar il-fruntiera taż-ŻEE. Jekk jogħġbok ikkonsulta l-link ’Europass’, fis-sezzjoni ’Suġġetti Relatati’ fuq il-portal tal-EURES għal aktar informazzjoni.
• Sempliċità Dawk li jfittxu l-ħaddiema normalment jaqraw is-CVs għal ftit sekondi qabel ma jagħżlu. Żomm is-CV tiegħek faċli biex tinftiehem mill-qarrej billi tuża sentenzi qosra, lingwaġġ pożittiv, u, fejn xieraq, termini tekniċi. Neħħi kwalunkwe informazzjoni żejda jew ripetittiva.
• Kisbiet Uri b’mod ċar ir-responsabbiltajiet preċedenti li jistgħu jkunu rilevanti għall-impjieg mixtieq anki jekk l-esperjenza tiegħek hija limitata. Ipprova uża verbi "attivi", uri relazzjoni bejn kawża u effett meta tiddeskrivi l-kisbiet tiegħek u għandek dejjem tenfasizza l-kisbiet tiegħek li jistgħu jitkejlu.
• Fattwali u komprensiva Kun żgur li l-informazzjoni li tipprovdi tkun fattwali, preċiża u rilevanti (eż. iffokata fuq il-ħtiġijiet ta’ min iħaddem). Ftakar li xi aspetti jew esperjenzi personali jistgħu jżidu l-valur fis-CV tiegħek - ix-xogħlijiet li kellek meta kont student, l-apprendistati, ix-xogħlijiet ta’ volontarjat jew ta’ waqt il-btajjel ċertament għenuk ittejjeb il-kompetenzi personali tiegħek. Għalhekk, kun żgur li ssemmi fil-qosor u b’mod ċar dawk l-attivitajiet u l-ħiliet li ksibt.
• Edukazzjoni Enfasizza l-kisbiet akkademiċi tiegħek kif ukoll kompetenzi oħrajn, b’mod partikolari jekk ma għandekx (jew ftit li xejn għandek) esperjenza professjonali. Saqsi lilek innifsek: "X’għandi fil-karriera edukattiva tiegħi li mgħandhomx f’pajjiżhom?"
• Tul Ipprova żomm is-CV tiegħek b’tul massimu ta’ 2 paġni (il-ħin ta’ min iħaddem huwa prezzjuż!). Ehmeż is-CV tiegħek ma’ ittra ta’ kopertura sabiex tintroduċi lilek innifsek u l-interess tiegħek fl-impjieg. Għid li tista’ tipprovdi informazzjoni addizzjonali jekk tintalab tagħmel dan.
• Ċarezza Ikteb is-CV inti stess u agħtiha lil persuna oħra għall-qari tal-provi qabel ma tpoġġiha fuq il-web portal tal-EURES jew tibgħatha lil min iħaddem.
• Referenzi F’ħafna pajjiżi, hija prattika komuni li jiġu pprovduti referenzi – ismijiet u dettalji ta’ kuntatt ta’ persuni li jistgħu jagħtu informazzjoni dwar l-applikant lil min iħaddem. Dejjem għandek tiċċekkja r-referenzi darbtejn u tassigura li jkollok il-permess tagħhom qabel ma tipprovdihom.
• Verżjonijiet immirati tas-CV Importanti: adatta s-CV standard tiegħek għall-profil tal-post tax-xogħol li int interessat/a fih. Dan ifisser li għandek tagħmel enfasi fuq il-kwalifiki, il-ħiliet, it-taħriġ jew l-esperjenzi speċifiċi b’rilevanza għall-post tax-xogħol battal magħżul.
• Tajjeb li tkun taf: - il-websajts ta’ dawk li jħaddmu sikwit jipprovdu informazzjoni rilevanti dwar il-miri u l-interessi tal-kumpanija; - xi websajts tal-gradwati u ċentri universitarji tal-karrieri joffru wkoll pariri u gwida dwar il-kitba tas-CV.

Kif tikteb ittra ta’ applikazzjoni?

• Għan Sakemm ma jiġix speċifikat mod ieħor fid-deskrizzjoni tal-post tax-xogħol battal jew jekk ikun hemm bżonn ta’ formola ta’ applikazzjoni speċifika, applikazzjoni normalment tkun komposta minn ittra ta’ kopertura u CV (preferibbilment is-CV Europass). L-ittra ta’ kopertura hija d-dokument li bih tintroduċi lilek innifsek ma’ min iħaddem u tesprimi l-interess tiegħek fil-post tax-xogħol battal.
• Karatteristiċi Fir-rigward tal-Curriculum Vitae, l-ittra ta’ applikazzjoni għandha tkun qasira (paġna waħda) u ċara. Żomm it-test sempliċi iżda oġġettiv. Iffoka fuq tliet jew erba’ entrati rilevanti (ara hawn taħt).
• Kontenut It-test tiegħek għandu jkun twil madwar 4 paragrafi, kull wieħed jiffoka fuq suġġett differenti. Pereżempju: 1) Esprimi l-interess tiegħek fl-impjieg u spjega kif sirt taf dwar il-post tax-xogħol battal; 2) Spjega għaliex inti interessat/a fl-impjieg u għaliex taħseb li għandek il-profil addattat; 3) Issottolinja kompetenza personali u professjonali waħda jew tnejn meħuda mis-CV li, fl-opinjoni tiegħek, tista’/jistgħu jżidu valur mal-applikazzjoni tiegħek; 4) Qabel ma tagħlaq l-ittra (eż. Dejjem tiegħek), esprimi d-disponibbiltà tiegħek għal intervista u l-possibbiltà li tipprovdi informazzjoni jew dokumenti addizzjonali fuq talba tagħhom.

Liema verżjoni lingwistika għandek tuża?

• Sakemm ma jkunx speċifikat b’mod ċar fl-avviż tal-post tax-xogħol battal, huwa preferibbli li tikteb fil-lingwa nazzjonali ta’ min iħaddem jew fil-lingwa tal-offerta tal-post tax-xogħol. Kif intqal qabel, fil-każ ta’ impjiegi transnazzjonali, l-Ingliż sikwit jiġi aċċettat bħala l-lingwa prinċipali tal-komunikazzjoni (segwit mill-Franċiż u l-Ġermaniż). Ikkuntattja Konsulent tal-EURES jekk teħtieġ aktar gwida.
• Jekk tkun taf il-lingwa tal-pajjiż ta’ fejn sejjer tgħix, kemm l-ittra kif ukoll is-CV għandhom jinkitbu preferibbilment minnek stess. Jekk il-post tax-xogħol battal jeħtieġ l-għarfien ta’ lingwa speċifika, inti għandek l-opportunità li turi l-kapaċitajiet lingwisitiċi tiegħek qabel ma ssir intervista. Għandek dejjem titlob lil xi ħadd sabiex jagħmel qari tal-provi tal-applikazzjoni qabel ma tibgħatha.
• Jekk tikteb applikazzjoni f’lingwa barranija, kun żgur li tispjega xi tfisser it-terminoloġija speċifika tal-edukazzjoni jew tal-kwalifiki fil-lingwa ta’ min iħaddem. Jekk ikun possibbli, iddeskrivi din it-terminoloġija b’eżempji komparabbli mill-pajjiż ta’ min iħaddem. Ikkuntattja Konsulent tal-EURES jekk ikollok bżonn aktar għajnuna.

Eżamijiet tal-għażla jew kompetizzjonijiet uffiċjali

• Ħafna kumpaniji kbar, kumpaniji internazzjonali jew istituzzjonijiet jeħtieġu applikanti sabiex ikomplu testijiet jew eżamijiet psikometriċi u tekniċi qabel l-intervista. Bosta jużaw ukoll ċentri ta’ valutazzjoni sabiex jiġġudikaw kif impjegati potenzjali jistgħu jwettqu ħidmiethom f’sitwazzjonijiet tal-ħajja reali. Huma biss dawk il-kandidati li jintgħażlu fl-ewwel fażi ta’ kompetizzjoni li jistgħu jgħaddu għat-tieni fażi (normalment l-intervista). Meta tipprepara għat-testijiet tal-għażla għandek tfittex għal kwalunkwe informazzjoni disponibbli dwar it-tip ta’ testijiet u eżerċizzji ta’ prattika li jintużaw mill-organizzazzjoni. Xi websajts iddedikati għall-gradwati u pubblikazzjonijiet speċjalizzati jelenkaw għodod u metodi popolari.

Preparazzjoni għall-intervista

• Informazzjoni ta’ sfond Kun żgur li tkun infurmat sewwa dwar il-kumpanija u tkun lest li tistaqsi mistoqsijiet kemm dwar il-kumpanija kif ukoll l-aspetti partikolari tal-impjieg. Qabbel il-kwalifiki ekwivalenti fil-pajjiż ta’ min iħaddem mal-kwalifiki tiegħek personali. Kun lest ukoll sabiex twieġeb mistoqsijiet dwar il-ħiliet tiegħek ta’ responsabbiltà / tekniċi / amministrattivi / fit-teħid tad-deċiżjonijiet u dwar kif dawn isibu posthom fil-profil tal-post tax-xogħol.
• Kompetenzi personali X’aktarx li tiġi mistoqsi turi bil-provi kemm taf il-lingwa tal-pajjiż fejn sejjer u turi kif il-ħiliet u l-attributi tiegħek huma xierqa għar-rekwiżiti tal-post tax-xogħol. Jekk inti ma tafx il-lingwa tal-pajjiż biżżejjed, uri li inti lest tagħmel passi ‘l quddiem sabiex ittejjeb l-għarfien lingwistiku tiegħek (possibbilment billi tattendi kors tal-lingwa). Agħmel sforz u uża l-vokabularju tiegħek, minkejja li limitat – uri li tista’ tasal u li ma taqtax qalbek faċilment!
• Xenarji tal-ħajja reali Qabel l-intervista, ġib eżempji ta’ sitwazzjonijiet ta’ sfida li kont kapaċi timmaniġġja u kun lest/a li tespandi fuqhom. Ipprepara verżjoni bil-miktub ta’ "taħdit konvinċenti" li għandu jintuża sabiex tikkonvinċi lil min iħaddem li inti l-persuna li qiegħed ifittex. F’każ ta’ intervista bit-telefon, dejjem żomm dan id-dokument lest u ħarreġ lilek innifsek sabiex tippreżenta dawn l-argumenti b’mod ċar.
• Mistoqsijiet mhux mistennija Taqtax qalbek meta tiġi mistoqsi mistoqsijiet ikkumplikati jew mhux mistennija. Ibqa’ kalm/a, ħu l-ħin tiegħek biex twieġeb u fuq kollox kun onest/a. Jekk ma tafx twieġeb tibżax tammetti, iżda spjega kif kieku tipprova ssib it-tweġiba jew is-soluzzjoni.
• Ħidma kollettiva Enfasizza l-kontribut tiegħek f’kisbiet kollettivi li kont involut fihom qabel. Il-ħiliet fit-tmexxija, il-ġestjoni jew l-interazzjoni soċjali għandhom jissemmew ukoll u jiġu sostnuti permezz ta’ eżempji.
• Dispożizzjonijiet dwar salarji u kuntratti Ikseb informazzjoni dwar ir-rati tas-salarji medji mħallsa (gross u/jew nett) għal xogħol simili u r-rekwiżiti tal-kwalifiki fil-pajjiż barrani fejn tixtieq tmur tgħix. Bl-istess mod, kun konxju tal-arranġamenti kuntrattwali u l-liġi dwar ix-xogħol fis-seħħ. Ikkonsulta s-sezzjoni "Ħajja u Xogħol" fuq il-portal tal-EURES għal aktar informazzjoni. Konsulent tal-EURES jista’ jkun ukoll ta’ għajnuna għalik.

Dokumenti rakkomandati li tieħu miegħek għall-intervista

• CV Diversi kopji tas-CV tiegħek fil-lingwa ta’ min iħaddem, u possibbilment bl-Ingliż ukoll.
• Ċertifikati Fotokopji taċ-ċertifikati tal-gradwazzjoni tiegħek, korsijiet tal-lingwa li attendejt jew kwalifiki oħrajn.
• Diploma(i) tradotta(i) Għal ċerti impjiegi, bħal fis-settur pubbliku, jista’ jkollok bżonn tikseb traduzzjoni ċertifikata tal-kwalifiki tiegħek, normalment disponibbli mill-istitut edukattiv tiegħek jew mill-ministeru rilevanti. Iċċekkja mal-awtorità edukattiva rilevanti f’pajjiżek.
• Dokumenti tal-identità Ħu miegħek passaport jew karta tal-identità u possibbilment kopja taċ-ċertifikat tat-twelid tiegħek.
• Dokument ta’ Assigurazzjoni fuq is-Saħħa Il-Karta Ewropea ta’ Assigurazzjoni fuq is-Saħħa (jew dokument ieħor ta’ assigurazzjoni tas-saħħa, b’mod speċjali fil-każ ta’ ċittadini mhux tal-UE) hija utli meta tmur barra l-pajjiż, jekk min jintervistak joffrilek pożizzjoni dak il-ħin stess jew sabiex tkopri l-ispejjeż tas-saħħa li ma jkunux mistennija.
• Ritratti tal-passaport Ġib ritratti tal-passaport għal identifikazzjoni aktar faċli tas-CV tiegħek jew kwalunkwe formalità oħra li tkun meħtieġa.
• Ittri ta’ rakkomandazzjoni L-ittri ta’ rakkomandazzjoni jistgħu jagħżluk minn kandidati oħrajn. Jekk ma għandek ebda esperjenza professjonali, ġib firma ta’ approvazzjoni mill-iskola / università tiegħek.

Qabel tippakkja, aħseb dwar:

• Il-kuntratt tax-xogħol Kun ċert li tirċievi kuntratt tax-xogħol (jew ittra ta’ impenn debitament iffirmata ) kif ukoll konferma tas-salarju tiegħek qabel ma titlaq. Ġib kopji ta’ kwalunkwe ftehimiet tax-xogħol kuntrattwali li għandek.
• Dokumentazzjoni Agħmel kopji duplikati ta’ dokumenti importanti inklużi karti tal-assigurazzjoni, passaport, kuntratti tax-xogħol, ċertifikati tat-twelid, kards tal-bank, eċċ. Iċċekkja jekk il-liċenzja tas-sewqan tiegħek hijiex valida.
• Korsijiet tal-lingwa Agħmel kors tal-lingwa, preferibbilment fil-lingwa tal-pajjiż fejn sejjer jew fil-lingwa li ser tkun qiegħed/qiegħda tuża fil-ħidma tiegħek ta’ kuljum.
• Opportunitajiet oħra ta’ tagħlim Ikseb informazzjoni u possibbilment applika għal korsijiet rilevanti tat-tip postuniversitarju / ta’ konverżjoni u għal skemi ta’ taħriġ fiż-ŻEE (eż. ħidma soċjali, tagħlim, servizzi soċjali, liġi, eċċ.). Il-maġġoranza tas-siti għall-gradwati u ċ-ċentru lokali akkademiku għal konsulenza dwar il-karrieri (jew assoċjazzjoni tal-istudenti) jistgħu jipprovdu informazzjoni xierqa. Sib aktar informazzjoni fis-sezzjoni "Tagħlim" fil-portal tal-EURES.
• Kontijiet bankarji Iċċekkja kemm ikollok bżonn flus kontanti fil-kont bankarju futur tiegħek meta tidħol fil-pajjiż tad-destinazzjoni. Ħu nota tar-referenzi tal-kont bankarju attwali tiegħek. Dawn tista’ tiġi bżonnhom barra biex tkun tista’ tagħmel trasferimenti bankarji.
• Assigurazzjonijiet Tinsiex tieħu dokument validu tal-assigurazzjoni tas-saħħa. Ikkunsidra wkoll il-possibbiltà li tagħmel assigurazzjoni tal-ivvjaġġar.
• Akkomodazzjoni/housing Fittex alternattivi ta’ akkomodazzjoni u prezzijiet tal-postijiet fil-pajjiż ta’ residenza tiegħek fil-ġejjieni (eż. riċerka bl-internet, assoċjazzjonijiet tal-ħostels taż-żgħażagħ għal akkomodazzjoni temporanja, eċċ.). Iċċekkja wkoll ir-rekwiżiti u l-estimi tal-prezzijiet sabiex tieħu miegħek dak li għandek iġġorr.
• Sigurtà Soċjali Ikkuntattja l-istituzzjoni tas-sigurtà soċjali tiegħek qabel ma titlaq sabiex tikseb l-informazzjoni neċessarja u l-formoli tal-UE meħtieġa u/jew Karta Ewropea ta’ Assigurazzjoni fuq is-Saħħa (għalik u għall-familja tiegħek, jekk ikun applikabbli). Informa ruħek dwar il-ftehimiet tal-pajjiż u dwar formalitajiet oħrajn għat-trasferiment tad-drittijiet tas-sigurtà soċjali (benefiċċji soċjali, benefiċċji tal-qgħad).
• Tassazzjoni Ikkuntattja l-awtoritajiet rilevanti fil-pajjiż ta’ oriġini tiegħek sabiex tikseb pariri personalizzati dwar il-ftehimiet ta’ tassazzjoni mal-pajjiż tad-destinazzjoni tiegħek.
• Familja Bħala ħaddiem mobbli, int u l-familja tiegħek għandkom l-istess drittijiet bħall-ħaddiema nazzjonali. Il-membri tal-familja tiegħek jistgħu jakkumpanjawk u jkollhom id-dritt għax-xogħol u jmorru l-iskola fil-pajjiż ta’ residenza ġdid tiegħek. L-EURES jista’ jgħinek issib xogħol għall-mara/ir-raġel jew is-sieħeb/sieħba tiegħek. Ikkuntattja Konsulent tal-EURES għal aktar informazzjoni.
• Skola għat-tfal L-aħjar mod kif issir taf dwar l-iskejjel u s-sistema edukattiva fil-pajjiż ta’ destinazzjoni tiegħek huwa li tikkuntattja Konsulent lokali tal-EURES. Fittex informazzjoni fuq il-websajt tal-awtorità tal-edukazzjoni rilevanti. Inti tista’ tikkuntattja wkoll l-awtorità tal-edukazzjoni nazzjonali tiegħek u/jew l-ambaxxata tal-pajjiż barrani sabiex titgħallem aktar dwar is-sistema tal-edukazzjoni u r-rekwiżiti ta’ studju ekwivalenti.

Ftit qabel ma titlaq...

• Kun żgur li twaqqaf legalment u b’mod xieraq kull relazzjoni kuntrattwali li jkollok ma’ dawk li jipprovdulek is-servizzi: akkomodazzjoni, ilma, gass, telefon, internet, TV, eċċ. Tista’ tikkunsidra wkoll il-bank u l-kumpaniji tal-assigurazzjoni tiegħek (ġeneralment għal żmien twil ħafna jew għal żmien definit fil-pajjiż tad-destinazzjoni).
• Informa lill-awtorità lokali tiegħek li sejjer tgħix barra l-pajjiż jekk dan ikun rekwiżit.
• Ibdel l-indirizz postali tiegħek mal-istituzzjonijiet jew l-entitajiet kollha li s-soltu taħdem magħhom.
• Informa lill-amministrazzjonijiet tat-taxxa u tal-benefiċċji soċjali tal-pajjiż ta’ oriġini tiegħek li ser titlaq.

Ftakar ukoll...

• Passaport validu u/jew karta tal-identità għalik u għall-membri tal-familja tiegħek.
• Viża għalik u/jew għall-membri tal-familja tiegħek jekk mintomx ċittadini nazzjonali taż-ŻEE (jew jekk għandkom il-ħsieb li tmorru tgħixu f’pajjiż barra miż-ŻEE).

• Akkomodazzjoni Anke jekk tagħmel tiftix bikri qabel ma titlaq mill-pajjiż tal-oriġini tiegħek, jista’ jkun li ssibha diffiċli biex issib akkomodazzjoni xierqa qabel ma tasal. Jekk min iħaddmek ma jistax jgħinek, ibda b’soluzzjoni temporanja u fittex akkomodazzjoni permanenti meta tasal. Fittex informazzjoni dwar id-dispożizzjonijiet legali u d-drittijiet u l-obbligi tal-partijiet applikabbli għal kera ta’ djar fil-pajjiż ġdid ta’ residenza tiegħek.
• Formalitajiet legali u amministrattivi Fil-maġġoranza tal-każijiet, uħud mill-formalitajiet legali għar-reġistrazzjoni tiegħek fil-pajjiż ġdid jiġu rranġati mill-impjegatur ġdid tiegħek (reġistrazzjoni tas-sigurtà soċjali, reġistrazzjoni mal-uffiċċju tat-taxxa, eċċ.). F’kull każ, kun af li inti għandek id-drittijiet u l-obbligi tiegħek. Ikkuntattja Konsulent tal-EURES jew l-awtoritajiet lokali sabiex issir taf aktar.
• Is-Sigurtà Soċjali Il-benefiċċji kollha tas-sigurtà soċjali marbuta ma’ kuntratt tax-xogħol fil-pajjiż jingħataw b’mod indaqs liċ-ċittadini kollha tal-UE/ŻEE. Il-benefiċċji soċjali jkopru l-lif tal-mard u tal-maternità, benefiċċji tal-qgħad u għall-familji, inċidenti fuq il-post tax-xogħol u mard relatat max-xogħol, pensjonijiet tal-invalidità u tal-anzjani.
• Tassazzjoni Pajjiżi Ewropej ikkonkludew ftehimiet bilaterali dwar it-taxxa sabiex jipprevjenu liċ-ċittadini tagħhom milli jħallsu darbtejn għall-istess attività jew dħul f’pajjiż ieħor.
• Reġistrazzjoni fl-uffiċċju lokali dwar il-popolazzjoni Irreġistra u akkwista l-karta tal-identità fil-pajjiż ġdid ta’ residenza tiegħek.
• Kont tal-bank Iftaħ kont bankarju ġdid u informa lill-impjegatur ġdid tiegħek (għal raġunijiet ta’ ħlas tas-salarju).
• Assigurazzjonijiet Jekk tikri jew tixtri dar jew jekk tixtri karozza, inti obbligat li tikseb assigurazzjoni kontra n-nar u kontra inċidenti perikolużi oħrajn. Ikseb informazzjoni dwar kumpaniji ta’ assigurazzjoni rakkomandati.
• Edukazzjoni u skola għat-tfal Ikseb informazzjoni dwar il-faċilitajiet u r-rekwiżiti għad-dħul fl-iskola għat-tfal. Websajts nazzjonali, l-awtoritajiet lokali jew saħansitra min iħaddmek jistgħu jgħinuk biex issib il-post fi skola li tkun l-aktar xierqa għat-tfal tiegħek.
• Lingwa u/jew taħriġ vokazzjonali Fuq l-inizjattiva tiegħek stess jew skont min iħaddmek, huwa ta’ vantaġġ li tattendi korsijiet imfassla apposta mmirati sabiex ittejjeb il-profiċjenza tiegħek fil-lingwa u/jew il-ħiliet professjonali tiegħek.
• Trasport lokali Meta tasal, u jiddependi mid-distanza bejn ir-residenza ġdida tiegħek u l-post fejn taħdem, fittex il-mezz ta’ trasport l-aktar ekonomiku u effiċjenti disponibbli. Ikkonsulta l-prezzijiet tal-biljetti u r-rati ta’ abbonament fix-xahar.
• Faċilitajiet kulturali u ta’ divertiment L-organizzazzjoni ta’ min iħaddmek, l-uffiċċju tal-amministrazzjoni lokali tiegħek, il-ġirien ġodda tiegħek u l-kollegi tax-xogħol, kif ukoll l-użu ta’ websajts nazzjonali jistgħu jgħinuk issib postijiet u attivitajiet interessanti fil-post il-ġdid ta’ residenza tiegħek.

A ħseb ukoll dwar ... ir-ritorn fil-pajjiż ta’ oriġini tiegħek

• Żomm kuntatti ma’ netwerk ta’ persuni f’pajjiżek u/jew tal-professjoni tiegħek. Fittex pariri, possibbilment ma’ Konsulent tal-EURES, dwar l-aħjar mod kif tenfasizza l-esperjenzi tiegħek barra l-pajjiż u ibda fittex ix-xogħol minn kmieni qabel terġa’ lura. L-EURES jista’ jgħinek issib opportunitajiet professjonali fil-pajjiż ta’ oriġini tiegħek.
• Tinsiex tistaqsi għall-formoli Ewropej ħafna qabel ma tħalli l-pajjiż ta’ residenza (E205 għall-irtirar, E301 / E303 għall-benefiċċji tal-qgħad, il-Karta Ewropea tal-Assigurazzjoni fuq is-Saħħa, eċċ.).

Jekk jogħġbok innota: il-passi li trid tieħu biex issib xogħol fil-pajjiż ta’ oriġini tiegħek waqt li tkun qiegħed/qiegħda tgħix f’pajjiż barrani huma sa ċertu punt simili għal dawk li japplikaw meta tmur/mort barra!