Kif toħloq elevator pitch konvinċenti bħala persuna gradwata li qed tfittex impjieg

Elevator pitch hija introduzzjoni qasira u attraenti tiegħek innifsek, tal-prodott tiegħek, jew ta’ idea tiegħek li biha tista’ tattira l-attenzjoni tal-udjenza tiegħek. Elevator pitch m’għandhiex tkun itwal minn minuta, u għandha tenfasizza l-punti pożittivi tiegħek. Bħala persuna gradwata li qed tfittex impjieg, tista’ tuża elevator pitch biex timpressjona lill-impjegaturi potenzjali u turi l-edukazzjoni, il-ħiliet, u l-potenzjal tiegħek b’mod konvinċenti u b’mod li wieħed jibqa’ jiftakru.

Bħala gradwat(a) reċenti, jista’ ma jkollokx ħafna esperjenza professjonali fuq xhiex tibbaża, iżda dan ma jfissirx li inti ma tistax tispikka mill-folla. Billi tikteb u tipprattika elevator pitch li tispikka u konċiża, dejjem tista’ tkun lest(a) li toħloq impressjoni mill-aqwa tiegħek. Dan huwa aktar u aktar ta’ sfida jekk qed tapplika għal impjieg f’pajjiż ieħor, għalhekk għandek tipprepara l-elevator pitch tiegħek bl-Ingliż jew bil-lingwa tal-pajjiż fejn tkun qed tapplika.
Dawn huma xi suġġerimenti dwar kif tfassal elevator pitch perfett bħala gradwat li qed ifittex impjieg:

• Ibda b’ismek, bl-edukazzjoni u bl-għan tal-karriera tiegħek. Pereżempju, “Ħello, jiena Lisa, u jiena ggradwajt dan l-aħħar fid-disinn grafiku. Qed infittex opportunità biex nuża l-kreattività u l-ħiliet tiegħi biex noħloq kontenut viżiv impressjonanti għal diversi pjattaformi tal-media.”
• Spjega x’valur tista’ toffri jew liema problema tista’ ssolvi. Pereżempju, “Jiena noqgħod attenta ħafna għad-disinn u għandi passjoni għar-rakkontar tal-istejjer. Nista’ ngħinek toħloq grafiki interessanti u effettivi li jistgħu jattiraw l-attenzjoni tal-udjenza tiegħek u b’hekk twassal il-messaġġ tiegħek.”
• Semmi l-kisbiet jew il-ħiliet rilevanti tiegħek li jagħmluk tispikka. Pereżempju, “Temmejt b’suċċess diversi proġetti fuq bażi freelance, bħad-disinn ta’ logos, flyers, u posters għal klijenti differenti. Irbaħt ukoll konkors tad-disinn u rċevejt feedback pożittiv mill-professuri u mill-pari tiegħi.”
• Spiċċa b’sejħa għal azzjoni jew mistoqsija li tistieden aktar konverżazzjoni. Pereżempju, “Jiena ħerqana li nissieħeb f’tim dinamiku u innovattiv fejn nista’ nitgħallem u nikber bħala disinjatriċi. Għandek xi pariri jew xi suġġerimenti għalija?”

Jekk ma għandekx esperjenza rilevanti, agħmel ċert li turi l-entużjażmu u l-passjoni tiegħek lill-impjegatur tiegħek permezz ta’ eżempji konkreti.  Pereżempju, jekk tixtieq taħdem fil-marketing diġitali, iżda qatt ma għamilt hekk qabel, tista’ ssemmi l-blog tiegħek li juri l-ħiliet diġitali tiegħek. Bħala gradwat żagħżugħa, jista’ ma jkollokx ħafna esperjenza, iżda għandek ħafna potenzjal. Tista’ timpressjona lill-impjegaturi billi turi l-ħerqa tiegħek biex titgħallem u biex tikber fl-industrija tagħhom. Impjegaturi internazzjonali jistgħu jkunu lesti li jinjoraw nuqqas ta’ esperjenza preċedenti jekk turi l-impenn u r-rieda tiegħek li titgħallem dwar kulturi oħra. L-elevator pitch tiegħek jista’ jkun utli f’diversi sitwazzjonijiet, bħal fieri tal-impjiegi, intervisti, avvenimenti ta’ networking, preżentazzjonijiet, u aktar. Ikteb kelmtejn qosra u li jiġbdu l-attenzjoni u pprattikahom b’vuċi għolja. B’hekk tkun lest(a) tintroduċi lilek innifsek b’mod professjonali fi kwalunkwe ħin.

Forsi l-ewwel impjieg tiegħek bħala gradwat se joffri xogħol mill-bogħod. Ara l-parir tagħna biex tibda taħdem mid-dar: Xogħol mill-bogħod: Gwida għall-impjegati l-ġodda

Aqra aktar:

Il-Jiem Ewropej għall-Impjiegi

Sib Il-Konsulenti tal-EURES​

Il-kundizzjonijiet tal-għajxien u tax-xogħol fil-pajjiżi tal-EURES

Bażi tad-data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

Il-EURES fuq Facebook

Il-EURES fuq Twitter

Il-EURES fuq LinkedIn