Benefiċjarju kuntent ieħor jaqsam l-istorja tiegħu mal-EURES Spanja

‘Bħal ħafna nies oħra, ir-raġuni għalfejn ġejt in-Netherlands kienet l-imħabba,’ bdiet Alejandra. Alejandra u l-għarus Olandiż tagħha riedu jieħdu l-pass li jmiss fir-relazzjoni tagħhom billi jersqu eqreb lejn xulxin. Peress li fi Spanja ma kienx hemm biżżejjed opportunitajiet ta’ impjiegi għall-għarus tagħha, Alejandra ddeċidiet li titlaq l-impjieg tagħha bħala għalliema tal-fotografija biex tiċċaqlaq lejn in-Netherlands.

‘Qabel iddeċidejt [li niċċaqlaq], qattajt xi żmien infaddal kemm nista’ u ddeċidejt li mmur l-uffiċċju tal-EURES f’Zaragoza biex nikseb naqra aktar informazzjoni u nivvaluta l-għażliet tiegħi,’ ftakret hi. ‘Hemmhekk, ipprovdewli l-informazzjoni u għenuni ntejjeb is-CV tiegħi. Irċevejt informazzjoni utli ħafna u speċifika, b’appoġġ ippersonalizzat li għeni wkoll inħossni aktar kunfidenti f’din il-fażi ġdida.’

Il-ħiliet lingwistiċi huma l-qofol

Meta żaret l-uffiċċju tal-EURES, Alejandra kienet sorpriża meta skopriet li minbarra li tirċievi pariri personalizzati mill-Konsulenti tal-EURES, kien hemm il-possibbiltà li tkun tista’ tirċievi appoġġ addizzjonali permezz ta’ Reactivate, l-iskema tal-UE għal mobilità fix-xogħol iddedikata għal dawk li qed ifittxu impjieg u li għandhom aktar minn 35 sena.

‘Huwa grazzi għal dawn il-pariri tajbin li jien irċevejt appoġġ biex nibda kors fil-lingwa Olandiża, li fl-opinjoni tiegħi kien il-qofol biex nadatta ruħi għall-ambjent il-ġdid tiegħi,’ spjegat hi.

‘Il-kors fl-Olandiż li għamilt bis-saħħa ta’ Reactivate ppermettieli nintegra ħafna aħjar u nħossni aktar kunfidenti fil-ħajja ta’ kuljum tiegħi,’ qalet Alejandra. ‘Ovvjament jirnexxilek tissopravivi hawn bl-Ingliż iżda fl-opinjoni tiegħi, il-fatt li tkun tista’ tifhem u titkellem il-bażiku jgħinek tintegra ħafna aħjar.’

‘Wara l-pariri li rċevejt - u b’xorti tajba’ - irnexxieli nsib impjieg f’kumpanija internazzjonali tal-laboratorji,’ qalet Alejandra. Għalkemm taħseb li x-xorti daħkitilha, huwa ċar li l-ħiliet tagħha fil-lingwa barranija kellhom rwol importanti biex issib l-impjieg tagħha.

‘Ir-rutina ta’ kuljum tiegħi hi li naħdem f’atmosfera internazzjonali ma’ kollegi internazzjonali u Olandiżi, u nipprovdi appoġġ lill-konsumaturi minn hawnhekk lill-konsumaturi fi Spanja,’ kompliet tgħid.

‘Ikolli ngħid li l-fatt li nitkellem lingwi oħra, bħall-Ingliż u l-Portugiż kif ukoll l-Ispanjol [nattiv tagħha], kien fattur ewlieni li ppermettieli nibda naħdem ftit wara li wasalt fin-Netherlands.’

‘Affaxxinanti u ta’ sfida’

‘Li tiċċaqlaq għal pajjiż ieħor mhux dejjem faċli,’ ammettiet Alejandra. ‘Ovvjament nimmissja ħafna l-belt tiegħi, u kull meta nkun nista’ mmur lura biex inqatta’ ftit jiem, nara lill-familja u lill-ħbieb.’

Madankollu, Alejandra hija kuntenta li ħadet il-pass li tiċċaqlaq barra minn pajjiżha biex taħdem, u tidher li qed tieħu pjaċir bl-isfida.

‘Kuntenta ħafna fin-Netherlands, u nħossni xxurtjata,’ qalet. ‘Huwa veru wkoll li biex tadatta ruħek għal ambjent ġdid, titkellem u titgħallem lingwi oħra jinvolvi sforz - u dan hu kemm affaxxinanti kif ukoll ta’ sfida.

‘Nixtieq ninkoraġġixxi lil dawk li għalihom importanti li jmorru lil hinn minn Spanja biex iżuru l-uffiċċju tal-EURES tagħhom - se jsibu tim uman u professjonali li lest jgħinhom u jagħti dak kollu li jista’.

Biex tkun taf kif EURES jista’ jgħin lilek ukoll, żur il-portal tal-EURES illum.

Tista’ taqra wkoll l-istorja oriġinali ta’ Alejandra (bl-Ispanjol) fuq il-paġna ta’Facebooktal-EURES Spanja(ara l-post bid-data tal-5 ta’ Diċembru 2018).

 

Links relatati:

Reactivate

Il-portal tal-EURES

EURES Spanja fuq Facebook

 

Aqra aktar:

Jiem Ewropej tal-Impjiegi

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn