6 suġġerimenti dwar Microsoft Word sabiex ittejjeb l-effiċjenza tiegħek

Dan huwa programm versatili b’mijiet ta’ karatteristiċi intelliġenti u shortcuts utli. F’dan l-artiklu, aħna se nitkellmu dwar uħud mill-favoriti tagħna, u nittamaw li dawn ikunu ta’ għajnuna għalik sabiex il-ħin li tqatta’ fuq Word ikun aktar effiċjenti u effettiv.

Jenħtieġ li jiġi nnotat li f’dan l-artiklu aħna se nkunu qed nirreferu għal Word 2016, għalhekk jekk inti għandek xi verżjoni preċedenti, jista’ jkun li wħud mill-karatteristiċi ma jkunux disponibbli.

Clear All Formatting (Neħħi l-Ifformattjar Kollu)

Fl-opinjoni umli tagħna, “Neħħi l-Ifformattjar Kollu” hija waħda mill-aħjar bidliet li saru f’Word sa mit-tneħħija tal-karatteristika mhux daqstant popolari “paperclip”. Kif jissuġġerixxi l-isem, din il-karatteristika tneħħi malajr u faċilment l-ifformattjar kollu minn test magħżul, u tagħti lura lil dak it-test l-issettjar default.

Għaliex dan huwa daqstant utli? Ngħiduha kif inhi, jekk xi darba kkupjajt u ppejstjajt test minn post ieħor (pereżempju mill-internet) f’Word, probabbli nnutajt li inti mhux biss ikollok kopja tal-kliem: iżda wkoll tal-ifformattjar kollu. Li jkollok tbiddel id-daqs tal-font, it-tip tal-font, il-kulur tal-font u l-ispazjar tal-linji kull darba huwa proċess li jieħu l-ħin – u xi drabi tispiċċa b’elementi li, tipprova kemm tipprova, ma tkunx tista’ tbiddilhom. “Neħħi l-Ifformattjar Kollu” tneħħilek din il-problema billi sempliċiment tikklikkja buttuna (Home > Font > ‘Clear All Formatting’ icon li tinsab fuq nett fuq il-lemin).

Format Painter (Ikkopja l-Format)

Dwar l-istess tema tal-ifformattjar, “Ikkopja l-Format” tippermettilek tikkopja l-ifformattjar minn post għall-ieħor. L-użu ta’ din il-karatteristika huwa malajr u faċli; jeħtieġlek biss tenfasizza l-ifformattjar li trid tikkopja, tagħżel l-għodda “Ikkopja l-Format” (Home > Clipboard > Format Painter) u mbagħad tikklikkja fuq it-test li tixtieq tapplikalu din il-karatteristika. Jekk tikklikkja darba fuq din l-opzjoni se tkun tista’ tikkopja l-ifformattjar darba biss qabel l-għodda tiġi diżattivata. Jekk tikklikkja darbtejn, l-opzjoni se tinżamm mixgħula u se tkun tista’ tikkopja l-istess ifformattjar bosta drabi.

Styles (Stili)

“Stili” huma bażikament forma aktar avvanzata tal-għodda “Ikkopja l-Format”. Għalkemm mal-ewwel daqqa t’għajn jaf ikunu skoraġġanti, fil-verità dawn huma mod kif inti tista’ tiddefinixxi minn qabel oġġetti bħlama huma d-daqs tal-font, il-kulur tal-font, l-ispazjar tal-linji, eċċ. Dan jista’ jkun partikolarment utli f’dokument itwal u se jgħinek tevita li jkollok tiskrollja lura f’paġni tat-test sabiex issib l-ifformattjar partikolari li tkun trid tikkopja.

Ladarba jkollok l-istili ssettjati, inti tista’ tapplikahom mill-ewwel fid-dokument tiegħek. Il-kwadru tal-wiri tal-istili jista’ jinstab taħt Home > Styles u fuq in-naħa tal-lemin tal-kwadru hemm tliet vleġeġ – ‘il fuq, ‘l isfel u ‘l isfel b’linja fuq il-vleġġa. Jekk tikklikkja t-tielet opzjoni inti tkun tista’ toħloq l-istili tiegħek.

Werrej

Li ddaħħal werrej huwa proċess pjuttost sempliċi u, qabel xejn, li ssib l-opzjoni tista’ tkun waħda mill-aktar partijiet diffiċli. Minflok tinsab taħt it-tab “Insert” (Daħħal) kif wieħed jista’ jistenna, l-opzjoni tal-werrej tinsab taħt References > Table of Contents. Jekk tikklikkja fuq “Werrej” se jinfetaħ menu li jinżel li fih kwalunkwe tabella default li tista’ tinħoloq fid-dokument tiegħek.

Issa inti għandek żewġ opzjonijiet: li tuża tabella default jew li toħloq waħda personalizzata. Jekk inti ma tridx tippersonalizza t-tabella tiegħek, jew ma tħossokx kunfidenti fl-istili, f’dak il-każ x’aktarx li l-aħjar għażla tkun li żżomm ma’ waħda mit-tabelli default. Ikklikkja fuq it-tabella sabiex iżżidha fid-dokument tiegħek u tkun tista’ tipproċedi.

Jekk inti diġà bdejt tuża xi ftit mill-istili tal-intestatura default (normalment magħrufa bħala ‘Heading 1’, ‘Heading 2’ jew ‘Heading 3’), f’dak il-każ kwalunkwe intestatura b’dawn l-istili se tidher awtomatikament fil-werrej. Jekk dan ma jsirx u t-tabella tiegħek hija vojta, tinkwetax – inti tista’ tagħżel l-intestaturi li tixtieq tinkludi b’mod manwali. L-ewwel nett, enfasizza l-intestatura inkwistjoni. Imbagħad, mur fuq l-opzjoni “Add Text” (Żid it-Test) u finalment agħżel il-livell xieraq. Meta terġa’ taġġorna l-werrej tiegħek, l-intestaturi se jidhru.

Peress li t-tabelli personalizzati huma ftit aktar ikkumplikati, ħallejna f’idejn l-esperti ta’ Microsoft biex jispjegaw il-proċess, u għalhekk jekk inti trid li jkollok kontroll sħiħ tat-tabella tiegħek kun ċert li tagħti ħarsa lejn il-parir tagħhom.

Irrepeti l-aħħar azzjoni tiegħek (F4)

Xi drabi ħidma fi programm bħal Word tista’ tinvolvi azzjonijiet ripetuti. L-aħbar tajba hi li minflok ikollok tirrepeti l-azzjoni kull darba b’mod manwali, inti tista’ sempliċiment tagħfas F4 sabiex tirrepeti b’mod awtomatiku l-aħħar azzjoni tiegħek kemm-il darba trid. Dan ma japplikax biss għal Word; is-shortcut F4 taħdem ukoll f’Microsoft PowerPoint u Excel u tiffranka ħafna ħin.

Simple Markup (Reviżjoni Semplifikata)

Il-karatteristika “Track Changes” (Reviżjonijiet) ilha teżisti bosta snin, iżda edizzjoni aktar riċenti hija l-opzjoni “Reviżjoni Ssimplifikata” (Review > Tracking > ‘Simple Markup’ fil-kaxxa li tinżel). Din il-karatteristika togħoġobna partikolarment minħabba li tippermettilek tara fejn tkun saret bidla kif ukoll ir-riżultat finali, mingħajr ma inti jkollok għalfejn tfittex b’diffikultà fir-reviżjonijiet (li, jekk inti jkollok bosta edituri, jaf joħloq konfużjoni!).

Jekk inti tixtieq tara x’kienet bidla partikolari, tista’ sempliċiment tikklikkja fuq il-linja l-ħamra fuq in-naħa tax-xellug tat-test u dan jattiva l-karatteristika kompletament.

Dawn huma s-6 suġġerimenti dwar Microsoft Word sabiex ittejjeb l-effiċjenza tiegħek. Ovvjament, hemm ħafna aktar karatteristiċi u shortcuts tajbin disponibbli f’Word, iżda dawn huma ftit li aħna nsibu partikolarment utli. Nittamaw li inti wkoll!

 

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi ta’ Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn