5 suġġerimenti għal bilanċ tajjeb għas-saħħa bejn ix-xogħol u l-ħajja privata matul ir-restrizzjonijiet tal-COVID-19 tax-xitwa

1.Agħti prijorità lil saħħtek

Huwa importanti li tiftakar tieħu ħsieb tiegħek innifsek billi tieħu pawżi regolari ’l bogħod mill-iskrivanija tiegħek u ssib modi kif tagħmel eżerċizzju. Hemm firxa wiesgħa ta’ klassijiet online disponibbli li jagħmluha aktar faċli biex tagħmel eżerċizzju fuq ġewwa f’ħin tajjeb għalik – kemm jekk tinteressak il-yoga jew it-taħriġ b’intensità għolja, kulħadd jista’ jsib xi ħaġa tgħodd għalih.

2.Iddeċiedi dwar rutina għax-xitwa

Ir-rutina tiegħek għal matul is-sajf li taħdem mid-dar tista’ ma taħdimx daqshekk tajjeb fil-jiem iqsar u t-temperaturi aktar kesħin fix-xitwa. Li tibdel il-ħinijiet tar-rutina ta’ kuljum tiegħek tista’ tgħinek tibbenefika aktar mill-ġurnata tiegħek. Ikkunsidra li tmur għal mixjiet jew ġirjiet waqt il-ħin tal-ikla tiegħek ta’ nofsinhar aktar milli wara x-xogħol biex tagħmel l-aħjar użu mid-dawl tax-xemx. Jekk tista’ taħdem b’mod flessibbli, tista’ wkoll tagħmel bidliet żgħar fis-sigħat li taħdem biex tagħmel l-aħjar użu mill-aħħar ftit dawl fil-ħin ta’ meta tispiċċa.

3.Żomm mal-istess regoli bażiċi

Jekk qed taħdem mid-dar, ipprova kompli saħħaħ drawwiet tajbin. Li tillimita x-xogħol tiegħek għal kamra waħda fid-dar, li tibda taħdem fl-istess ħin kuljum, li żżomm il-kamra tal-uffiċċju tiegħek nadifa u tieħu pawżi regolari kemm billi sserraħ għajnejk minn fuq l-iskrin u tqum, billi tħalli l-iskrivanija tiegħek u ġġebbed saqajk kollha jistgħu jgħinu biex jinżamm bilanċ tajjeb għas-saħħa bejn ix-xogħol u l-ħajja privata. Jekk kellek tħabbat wiċċek ma’ restrizzjonijiet tal-COVID-19 għal perjodu twil ta’ żmien, ipprova tħallix lid-drawwiet tajbin tiegħek jonqsu.

4.Ibqa’ soċjevoli

Filwaqt li r-restrizzjonijiet tal-COVID-19 jistgħu jwaqqfuk milli żżur il-post tax-xogħol tiegħek jew tara lil ħbiebek, Zoom, Microsoft Teams u Facetime jistgħu jkunu għodod siewja biex tikkomunika man-nies. Xorta tista’ tiċċelebra ġranet ta’ għeluq is-snin u festi billi tibgħat kartolini u tieħu belgħa te jew tazza nbid fuq Zoom. Li tagħmel sforz biex titkellem mal-kollegi għal ħames minuti bil-kamera tiegħek mixgħula tista’ tagħmel differenza kbira lill-ġurnata tiegħek u inti tista’ tkun l-unika persuna li jitkellmu magħha waqt li jkunu qed jaħdmu mid-dar.

5.Fittex divertiment online

Aktar u aktar avvenimenti mxew online minħabba l-COVID-19. Dan ifisser li xorta tista’ tattendi kunċerti, kwiżżijiet, wirjiet, spettakkli li jdaħħku u klassijiet tat-tisjir mis-salott tiegħek! Dawn l-avvenimenti jistgħu jagħtuk xi ħaġa li tkun ħerqan għaliha fi tmiem il-ġimgħa tiegħek u toħloq memorji divertenti biex taqsam ma’ sħabek filwaqt li ssegwi l-gwida tal-gvern.

Għalhekk, hemm huma – 5 suġġerimenti biex iżżomm bilanċ tajjeb għas-saħħa bejn ix-xogħol u l-ħajja privata matul ir-restrizzjonijiet tal-COVID-19 tax-xitwa. Għal aktar pariri dwar xogħol mid-dar, ara l-paġna web tagħna Agħmel ix-xogħol mid-dar aktar faċli b’ħames passi sempliċi.

Links relatati:

Zoom

Microsoft Teams

FaceTime

Agħmel ix-xogħol mid-dar aktar faċli b’ħames passi sempliċi

Aqra aktar:

Jiem Ewropej tal-Impjiegi

Drop’pin@EURES

Sib Konsulenti tal-EURES

Kondizzjonijiet tal-għajxien u tax-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Kalendarju tal-Avvenimenti tal-EURES

Avvenimenti Online li ġejjin

Il-EURES fuq Facebook

Il-EURES fuq Twitter

Il-EURES fuq LinkedIn