Kif tuża l-profil tiegħek fuq LinkedIn biex tilħaq b’suċċess lill-impjegaturi

Ottimizza l-profil tiegħek
Bħas-CV tiegħek, il-profil tiegħek fuq LinkedIn huwa opportunità biex tħalli impressjoni tajba. Id-differenza hija li wieħed jista’ jara dan il-profil sempliċement billi jikklikkja buttuna, minn kwalunkwe post fid-dinja u meta jrid! Hawnhekk ser issib lista ta’ kontroll qasira biex tiżgura li l-profil tiegħek iħalli l-impatt mixtieq:

• Inkludi titolu ewlieni ċar. Ir-reklutaturi jridu jifhmu minnufih x’inhi l-ispeċjalità tiegħek biex jaraw jekk din taqbilx mal-postijiet battala tagħhom.
• Uża l-kaxxa sommarju biex turi għaliex il-kredenzjali tiegħek jagħmluk impjegat/a ideali. Kun konċiż/a nkella dak li jkun ma jaqrax it-test kollu. Ikteb ftit sentenzi dwar il-miri li tixtieq tilħaq fil-karriera tiegħek, kif ukoll x’tista’ toffri lil kumpanija. Imbagħad inkludi t-tieni paragrafu fejn telenka x’ħiliet speċifiċi tista’ toffri.
• Agħmilha faċli biex wieħed isib il-profil tiegħek. Jekk tissettja l-profil tiegħek għal ‘publicly available’ (disponibbli pubblikament) jew tal-anqas ‘searchable’ (jista’ jiġi mfittex) iżżid iċ-ċansijiet li impjegaturi potenzjali jaraw il-profil tiegħek.
• Staqsi lill-impjegaturi preċedenti jew lill-kollegi għal rakkomandazzjonijiet bil-miktub. Referenza personali tidher aħjar mis-sempliċi ġbir ta’ rakkomandazzjonijiet fil-lista ta’ ħiliet tiegħek.
• Agħmel lista tal-impjiegi passati (jew preżenti) tiegħek u agħti dettalji dwar ir-rwol li kellek hemmhekk. Tinsiex tinkludi l-aħjar kisbiet tiegħek u x’ħiliet jew esperjenza ksibt.
• Semmi kull organizzazzjoni professjonali li inti membru tagħha.
• Żid l-interessi u passatempi personali l-aktar interessanti tiegħek li jirriflettu bl-aħjar mod il-ħiliet tiegħek. Wieħed minnhom jista’ jkun il-fattur ewlieni li juri lil reklutatur xi rwol jista’ jkollok fil-kumpanija.
• Agħżel ritratt professjonali. Fir-ritratt tiegħek ara li tkun tidher bl-aħjar mod possibbli. Ara li wiċċek ikun jidher u kun ċert/a li tagħti l-immaġni t-tajba tat-tip ta’ persuna li int. Għandek tidher soċjevoli u pożittiv/a, iżda professjonali.
• Iċċekkja li ma għandekx żbalji ortografiċi jew grammatikali. L-ewwel ikteb it-testi tiegħek fuq dokument biex tkun tista’ tuża l-iċċekkjar awtomatiku. Qabel ma tippubblika l-profil tiegħek erġa’ aqra t-test kollu b’attenzjoni. Uża dizzjunarju jekk ikollok xi dubju dwar l-ortografija.

Issa lest/a biex tibda tfittex xogħol!

Agħmel lista ta’ kumpaniji fil-mira

Ibda bil-kumpaniji kollha li taf li tixtieq taħdem magħhom u fejn tista' tapplika l-ħiliet professjonali tiegħek. Inkludi l-impjegatur preċedenti tiegħek biex tagħmel kuntatt ma’ kwalunkwe kolleai preċedenti li jista’ jespandi n-network tiegħek.

Uża l-Company Search (Tfittxija ta’ Kumpaniji) ta’ LinkedIn biex issib kumpaniji oħra fil-linja tax-xogħol tiegħek. Tista’ tibda billi tfittex permezz ta’ kliem ewlieni, u mbagħad tista’ tikklassifikahom skont il-lokalità u jekk għandekx kuntatti hemmhekk. Inkludi kwalunkwe kompetitur jew kumpanija msieħba tal-impjegatur preċedenti tiegħek.

Sib l-“Aqwa Għaxra”

Fittex f’Google għall-aqwa impjegaturi fil-linja tax-xogħol tiegħek. Imbagħad mur fuq siti bħal Glassdoor biex tfittex valutazzjonijiet min-naħa tal-impjegati. Oqgħod attent/a għal kwalunkwe artiklu reċenti fil-midja li jista’ jagħtik idea ta’ kif sejjer in-negozju.

Iċċekkja l-Company Pages (Paġni tal-Kumpaniji) ta’ dawn il-kumpaniji fuq LinkedIn biex tara kemm jimpjegaw nies.

Agħmel kuntatt

Uża l-għodda tat-tiftix ta’ LinkedIn biex issib persuni li jaħdmu f’kull kumpanija. Dan jurik jekk hemmx persuni li diġà taf hemmhekk, jew permezz tal-kuntatti diretti tiegħek u ta’ xi alunni tal-università, jew permezz ta’ gruppi jew diskussjonijiet ta’ interess speċjali.

Ibgħat messaġġ dirett lill-persuni li jaħdmu hemm u li għandek konnessjoni magħhom. Għidilhom li inti interessat/a li taħdem mal-kumpanija u staqsihom għal parir dwar lil min għandek tikkuntattja dwar xogħlijiet disponibbli.

Fittex il-maniġers ta’ reklutaġġ jew xi ħadd ieħor f’pożizzjoni ta’ responsabbiltà fid-dipartiment rilevanti. Jekk ikollok xi kuntatti komuni, tista’ tistedinhom direttament biex tikkonnettja magħhom. Jekk le, LinkedIn jagħtik suġġerimenti ta’ persuni li jistgħu jintroduċuk. Dejjem inkludi messaġġ ta’ introduzzjoni biex turi l-interess tiegħek fil-kumpanija. Għid x’tista’ toffri lill-kumpanija u għidilhom li tixtieq tkun taf b’xi xogħol disponibbli hemm.

Sib kumpaniji jew persuni b’interessi simili għal tiegħek

Qiegħed tfittex bidla? Inti diżinjatur grafiku u tixtieq toħloq qxur tal-kotba oriġinali? Tħobb l-isports u tixtieq ikollok karriera fl-iddisinjar tal-ħwejjeġ tal-isports? Fittex kumpaniji relatati mal-interessi tiegħek u ara f’liema pożizzjonijiet jaħdmu n-nies hemmhekk. Agħmel kuntatti ġodda ma’ ħaddiema oħra b’interessi simili. Dawn jistgħu jqabduk ma’ kumpaniji oħra biex twessa’ t-tfittxija ta’ xogħol tiegħek.

Meta ssegwi kumpaniji li joperaw f’oqsma relatati mal-interessi tiegħek dan jimmotivak biex tibqa’ tfittex ix-xogħol b’mod attiv. Il-ħaġa importanti li trid tiftakar hija: tistenniex ir-reklam — agħmel l-ewwel pass sabiex tkun disponibbli malli jkun hemm opportunità ta' xogħol. Ikkuntattja impjegaturi li temmen li jiswielek taħdem magħhom. It-turija ta’ interess personali tagħmel differenza kbira fil-klassifikazzjoni tal-profil tiegħek u tgħinek issib l-impjieg li dejjem xtaqt!

Trid issir taf aktar dwar kif tista’ tisfrutta bl-aħjar mod dan il-kanal versatili tal-midja soċjali u tiġbed l-attenzjoni tar-reklutaturi? Agħti titwila lejn l-aqwa 10 modi kif tispikka fuq LinkedIn.

Links relatati:

EURES LinkedIn page

Aqra aktar:

Jiem l-Impjiegi Ewropej

Drop’pin@EURES

Sib Membru tal-Persunal tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn