L-aqwa seba' suġġerimenti biex tnaqqas l-ansjetà tiegħek dwar ir-ritorn fl-uffiċċju

Li tħossok anzjuż dwar ir-ritorn fl-uffiċċju huwa perfettament normali. Kemm jekk inti mħasseb dwar saħħtek jew dwar dik ta’ xi ħadd fl-unità domestika tiegħek, qed tibża’ mill-vjaġġ twil lejn ix-xogħol, jew sempliċiment drajt taħdem mid-dar – l-ansjetà dwar ir-ritorn fl-uffiċċju għandha tittieħed bis-serjetà. Li tieħu ħsieb is-saħħa mentali tiegħek huwa importanti daqs li tieħu ħsieb is-saħħa fiżika tiegħek. Għalhekk jekk qed tibża’ tirritorna għax-xogħol, ippreparajna xi suġġerimenti biex ngħinuk tagħmel it-tranżizzjoni tiegħek iktar faċilment.

Tinjorax dak li qed tħoss

Xi kultant meta nħossuna anzjużi dwar ix-xogħol, inħossuna imbarazzati għax naħsbu li aħna l-uniċi li qed inħossuna hekk. Huwa importanti li ma tinjorax l-ansjetà tiegħek, iżda li tiffaċċjaha u tipprova tifhem is-sors tagħha. Dan ma jfissirx li għandek tiffoka fuq is-sentimenti negattivi tiegħek. Li tiffaċċja l-biżgħat tiegħek u tifhimhom huwa l-ewwel pass biex tindirizzahom.

Ipprepara ruħek għall-kundizzjonijiet tax-xogħol il-ġodda

L-affarijiet jistgħu jkunu qegħdin jirritornaw lura għan-normal, iżda dan ma jfissirx li l-ambjent tax-xogħol tiegħek se jkun l-istess bħal qabel il-pandemija. Jista’ jkun hemm bidliet fis-seħħ biex l-impjegati jinżammu sikuri, bħar-regoli tat-tbegħid soċjali u l-maskri tal-wiċċ obbligatorji. Tista’ tkun teħtieġ ftit jiem jew ġimgħat biex tidra taħdem f’dan l-ambjent il-ġdid, u dan jista’ jġiegħlek tħossok aktar għajjien mis-soltu wara ġurnata xogħol.

Żomm bilanċ tajjeb bejn ix-xogħol u l-ħajja privata

Ix−xogħol mid-dar jista’ jkollu l-iżvantaġġi tiegħu, iżda ħafna nies jirrapportaw li tejjeb ħafna l-bilanċ bejn ix-xogħol u l-ħajja privata u l-benesseri tagħhom. Tħallix ir-ritorn fl-uffiċċju jaffettwa r-rutina tiegħek ta’ kuljum. Pereżempju, jekk inti mdorri tmur passiġġata fil-ħin tal-ikel, żomm ma’ din ir-rutina minkejja l-post tax-xogħol “ġdid” tiegħek, u pprova spiċċa xogħlok  fil-ħin kull meta jkun possibbli.

Identifika s-sinjali tal-istress tiegħek

Il-ġisem jurik li jkun taħt stress, pereżempju meta żżomm ix-xedaq magħfus, spallejk u dahrek iebsin, jew il-mod kif tieħu n-nifs. Jekk tħossok taħt stress fl-uffiċċju, ħu minuta biex tidentifika dawn is-sinjali, ħu ftit nifsijiet fondi, u rrilassa u tmattar jew ħaddem dik il-parti ta' ġismek.

Xerred il-pożittività

Agħmel sforz biex tkun sors ta’ pożittività għall-kollegi tiegħek. Għall-bidu tista’ ssibha diffiċli, iżda malajr tirrealizza li dan huwa ta’ benefiċċju għalihom kif ukoll għalik. Dan l-approċċ se jgħinek tiffoka fuq l-aspetti pożittivi tar-ritorn fl-uffiċċju u mhux taħseb kontinwament fuq xenarji negattivi.

Esplora l-għażla ta' xogħol flessibbli

Ara x’inhi l-politika tal-kumpanija tiegħek dwar ix-xogħol flessibbli. Tista’ tiftiehem mal-impjegatur tiegħek dwar approċċ ibridu fejn taħdem mill-uffiċċju ftit jiem biss fil-ġimgħa. Tista’ tiddiskuti wkoll iċ-ċaqliq tas-sigħat tax-xogħol tiegħek biex tevita t-traffiku ta’ filgħodu/ta’ filgħaxija.

Tibżax titlob għall-għajnuna

Jekk qed tħoss li l-ansjetà qed tirkbek u għandek bżonn l-għajnuna, staqsi lir-Riżorsi Umani dwar kwalunkwe programm ta' saħħa mentali/benesseri disponibbli għalik. Taħsibhiex darbtejn biex tistaqsi wkoll lit-tabib tiegħek jew lil professjonist ieħor fil-qasam tas-saħħa għall-appoġġ.

Il-pandemija tal-COVID-19 bidlitilna ħajjitna f’diversi modi, b'mod partikolari fuq il-post tax-xogħol. L-iskedi, l-għodod, l-ambjenti u l-prijoritajiet tax-xogħol intlaqtu mill-kriżi tas-saħħa. Ara dan l-artiklu biex issir taf għaliex ix-xogħol fl-2021 jista’ jkun differenti.

 

Links relatati:

Kif il-pandemija tista’ taffettwa d-dinja tax-xogħol fl-2021

 

Aqra aktar:

Il-Jiem tal-Impjiegi Ewropej

Sib Konsulenti tal-EURES

Kondizzjonijiet tal-ħajja u tax-xogħol fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn