Kull mentor tajjeb għandu jagħmel dawn l-10 affarijiet

Siru afu lil xulxin

Biex tistabbilixxi relazzjoni tajba ta’ xogħol mal-mentees tiegħek, huwa importanti li l-ewwel issiru tafu lil xulxin. Kemm jekk f’kamra tal-laqgħat, sessjonijiet għal waqfiet jew fil-kċina tal-uffiċċju – ħu l-ħin biex titgħallem aktar dwar il-mentees tiegħek, min fejn ikunu ġejjin, x’wassalhom biex japplikaw għall-programm, x’inhuma l-interessi u l-aspirazzjonijiet tagħhom. Għidilhom dwarek innifsek ukoll. Dan iwassal biex il-partijiet iħossuhom aktar komdi u jaqbdu diskursata.

Ibni relazzjoni ta’ kooperazzjoni

Spjega lill-mentees tiegħek li inti m’intix il-kap u lanqas l-għalliem tagħhom. Minflok, inti l-kollega tagħhom f’din l-esperjenza u qiegħed/qiegħda hawn biex tgħinhom jisfruttaw bl-aħjar mod il-programm ta’ mentoraġġ tagħhom.

Oħloq objettivi personalizzati

Kull programm ta’ mentoraġġ għandu jkollu għanijiet ċari. Aħdem flimkien mal-mentees tiegħek biex tistabbilixxi l-objettivi tagħhom. Staqsihom x’objettivi jixtiequ jilħqu minn dan il-mentoraġġ, liema ħiliet jixtiequ jitgħallmu u liema esperjenza jixtiequ jiksbu. L-iffissar ta’ għanijiet personalizzati jżomm lill-mentees tiegħek motivati u jagħmel l-esperjenza tagħhom aktar interessanti.

Stabbilixxi komunikazzjoni ta’ kuljum

Kultant ir-rwol ta’ mentor tista’ tħossu bħala piż minħabba li ħafna drabi jkun addizzjonali mal-lista ta’ kompiti li trid twettaq. Irrispettivament minn kemm int impenjat(a), kun ċert(a) li jkollok ħin iddedikat biex tkellem lill-mentees tiegħek mill-inqas darba kuljum. Tħalli li qatt ma jħossuhom li qed jikkawżaw inkonvenjent.

Għallimhom biex isibu triqithom

Mentor tajjeb juża taħlita ta’ pariri u mistoqsijiet ta’ gwida. Xi drabi, li tiggwida lill-mentees tiegħek biex isibu t-tweġiba huma stess jista’ jkun ta’ valur akbar milli sempliċiment tagħtihom is-soluzzjoni.

Tibżax tgħid “Ma nafx”

Jista’ jkun li ma għandekx tweġiba tajba għall-mistoqsijiet tal-mentees tiegħek. Tibżax tgħid “Ma nafx” u staqsi lil kollegi oħra għal parir. Dan iservi ta’ tagħlima għall-mentees tiegħek dwar il-ħidma f’tim u l-onestà.

Żomm attitudni b’moħħok miftuħ

Xi drabi, li jkollok il-perspettiva ta’ persuna li ġejja minn barra tista’ twassal għal titjib ġdid fi proċessi ta’ xogħol antiki. Il-mentees tiegħek jistgħu jinnutaw żball fix-xogħol tiegħek jew jistgħu jindikaw mod ta’ kif il-metodi tiegħek jistgħu jittejbu. Li tieħu responsabbiltà għan-nuqqasijiet tiegħek jibni fiduċja fir-relazzjoni tiegħek mal-persuna li tkun qed tagħti mentoraġġ.

Kun pożittiv

Kun ċert(a) li tkun dejjem kostruttiv(a) meta tagħti l-feedback. Dejjem agħti rikonoxximent meta l-mentees tiegħek iwettqu xogħol tajjeb. Dawn l-affermazzjonijiet żgħar jgħinuhom biex jibnu l-fiduċja tagħhom fihom infushom.

Kun empatiku

Tinsiex li anki inti xi darba ma kellekx esperjenza. Ambjent tax-xogħol ġdid, kompiti li l-persuna ma tkunx familjari magħhom u kollegi ġodda – dan kollu jista’ jikkontribwixxi għal esperjenza stressanti. Kun ċert(a) li l-mentees tiegħek iħossuhom komdi fuq il-post tax-xogħol u indirizza kwalunkwe insigurtà li jista’ jkollhom.

Mexxi bl-eżempju

Ovvjament mentor tajjeb għandu wkoll ikun iservi ta’ mudell li persuna għandha ssegwi. Jekk tistenna li l-mentees tiegħek jidħlu għax-xogħol fil-ħin u jibqgħu ffukati matul il-jum tax-xogħol, inti trid issegwi l-pariri tiegħek stess. Kun l-impjegat li inti tixtieq li jkunu.

Programm ta’ internship żviluppat tajjeb jista’ jrendi ħafna benefiċċji, kemm għan-negozju tiegħek kif ukoll għall-intern. Ara s-suġġerimenti tagħna dwar il-mod kif tispikka bħala impjegatur preferut ta’ interns fost il-kompetituri tiegħek.

Links relatati:

Kif tiżviluppa programm ta’ internship kompetittiv għall-kumpanija tiegħek

Aqra aktar:

Il-Jiem tal-Impjiegi Ewropej

Sib Konsulenti tal-EURES

Kundizzjonijiet tal-ħajja u x-xogħol fil-pajjiżi tal-EURES

Bażi tad-data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn