Kif tista’ tisfrutta Drop’pin@EURES bl-aħjar mod: żgħażagħ

Oħloq kont

Jekk għad ma għandekx kont mal-EURES, dan huwa l-ewwel pass ovvju li għandek tagħmel. Qatta’ ftit tal-minuti mill-ħin tiegħek timla l-formola online sempliċi u b’hekk tikseb aċċess għall-firxa sħiħa ta’ opportunitajiet ta’ Drop’pin@EURES.

Importa jew oħloq is-CV tiegħek online

Għandek żewġ għażliet meta tiġi għas-CV tiegħek: timporta wieħed eżistenti fil-format tal-Europass jew toħloq wieħed mill-ġdid fis-sistema tal-EURES. Jekk tagħżel it-tieni għażla kull ma għandek tagħmel huwa li tagħżel il-lingwa li tixtieq tuża u ttemm il-proċess li fih 10 passi. Imbagħad is-CV tiegħek jiżdied mal-bażi tad-data tal-EURES, fejn impjegaturi potenzjali jistgħu jaraw il-ħiliet, l-esperjenza u t-talenti tiegħek. Tista’ teditja s-CV tiegħek fi kwalunkwe ħin, anki wara li jkun ġie ppubblikat fuq il-bażi tad-data, u barra minn hekk hemm konfigurazzjonijiet ta’ privatezza li jippermettulek tagħżel liema informazzjoni tixtieq li dawn l-impjegaturi potenzjali jkunu jistgħu jaraw.

Iddefinixxi kriterju tat-tiftix għal impjieg/opportunità

Din il-karatteristika qiegħda hemm sabiex tiffaċilitalek kemm jista’ jkun it-tfittxija tiegħek għal opportunitajiet ġodda. Tista’ toħloq profili speċifiċi ta’ tiftix fejn tista’ tiddefinixxi kriterji bħall-post, it-tul tal-kuntratt u t-tip ta’ kuntratt. Issejvja l-profil u meta terġa’ żżur Drop’pin@EURES tista’ terġa twettaq it-tfittxija tiegħek sempliċiment billi tagħfas buttuna.

Applika għal opportunitajiet

Ladarba ssib opportunità li tinteressak, tista’ tapplika. Tista’ ssib kif tagħmel dan taħt is-sezzjoni "kif tapplika" ta’ kull opportunità, li ħafna drabi tieħdok fis-sit web tal-kumpanija jew tal-organizzazzjoni. Kull proċess ta’ applikazzjoni ser ikun differenti, u għalhekk kun ċert/a li tiffoka fuq ir-rekwiżiti speċifikati sabiex ikollok l-aħjar ċans ta’ suċċess.

Iċċekkja regolarment il-Kalendarju tal-Avvenimenti tal-EURES

Il-Kalendarju tal-Avvenimenti tal-EURES jurik l-avvenimenti li ser isiru fl-Ewropa, bħal fieri dwar l-impjiegi u Jiem l-Impjiegi Ewropej (online u fuq il-post). Peress li avvenimenti relatati max-xogħol huma mod tajjeb ħafna ta’ netwerking, biex tibni konnessjonijiet u tiskopri opportunitajiet ġodda, tista’ tkun idea tajba li tiċċekkja l-kalendarju b’mod regolari sabiex tara liema avvenimenti qed iseħħu fl-oqsma ta’ interess tiegħek u ssir taf kif tista’ tinvolvi ruħek.

Ibbrawżja l-arkivju tal-aħbarijiet għal pariri siewja

It-taqsima tal-aħbarijiet ta’ Drop’pin@EURES hija mimlija b’artikli li joffru pariri, gwida u għarfien dwar suġġetti ewlenin li huma relatati mal-edukazzjoni u mat-taħriġ vokazzjonali (ETV). Kollox huwa kopert, minn kif tissimplifika s-CV tiegħek sa liema apps jgħinuk taħdem b’mod effiċjenti fuq ix-xogħol, li tagħmilha minjiera tad-deheb għal persuni li jaspiraw li jsibu xogħol.

Skopri l-ewwel impjieg EURES tiegħek u l-inizjattiva ta’ traineeships ma’ Digital Opportunity

Drop’pin@EURES mhux biss jippubblika l-opportunitajiet tiegħu; iżda jappoġġja wkoll inizjattivi u servizzi bħal L-ewwel impjieg EURES tiegħek u t-Traineeships ma’ Digital Opportunity. It-tnejn li huma joffru liż-żgħażagħ iċ-ċans li jespandu l-ħiliet tagħhom u jiksbu esperjenza siewja ta’ xogħol f’pajjiż ieħor tal-UE, għalhekk ta’ min jagħtihom daqqa t’għajn.

Sir af aktar

Tixtieq issir taf aktar dwar Drop’pin@EURES u x’jista’ joffri? Żur is-sit web ta’ Drop’pin@EURES jew agħti ħarsa lejn l-aħħar pubblikazzjoni tagħna.

 

Links relatati:

Formola online

Kif timporta CV eżistenti

Oħloq profili speċifiċi ta’ tfittxija

Il-Kalendarju tal-Avvenimenti tal-EURES

Taqsima tal-aħbarijiet

L-ewwel impjieg EURES tiegħek

Traineeships ma’ Digital Opportunity

L-aħħar pubblikazzjoni

 

Aqra aktar:

Jiem l-Impjiegi Ewropej

Drop’pin@EURES

Sib Konsulent tal-EURES

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Online li ġejjin

L-EURES fuq Facebook

L-EURES fuq Twitter

L-EURES fuq LinkedIn