Mentoraġġ dwar il-karrieri: Nappoġġaw lill-forza tax-xogħol ta’ għada

Tista’ tgħidilna aktar dwarek u dwar ir-rwol tiegħek bħala mentor?

Gradwajt mill-University of Nottingham fl-1983. Minkejja li kelli interess li nsir psikologu edukattiv, dħalt fid-dinja tan-negozju mingħajr ma kont naf kważi xejn dwar kif verament stajt nirnexxi. Sensiela ta’ rwoli wassluni biex nispeċjalizza fl-iżvilupp tan-negozju, b’mod partikolari fl-iżvilupp ta’ strateġiji ta’ sħubija.  Issa, għandi n-negozju tiegħi fejn ngħin lin-negozji żgħar biex jikbru.

Ftit aktar minn tliet snin ilu, l-università għamlet kuntatt mal-alumni f’impetu biex ittejjeb il-qafas ta’ appoġġ tagħha għall-istudenti universitarji u l-alumni riċenti. Fir-rwol tiegħi bħala mentor fil-qasam tal-karrieri, jien impenjat li ngħin lill-imħuħ żgħażagħ fil-bidu tal-karriera tagħhom, kif ukoll li ninvesti fit-tagħlim tul il-ħajja għalija nnifsi.

B’mod ġenerali, x’tip ta’ appoġġ toffri lill-istudenti tiegħek?

Ngħin lill-mentees dwar kif għandhom jersqu lejn id-dinja kummerċjali u kif għandhom jitħejjew għaliha, kemm jekk għal internships, kollokamenti jew impjieg. L-istudenti jagħżlu lill-mentor tagħhom abbażi tal-isfond, l-esperjenza u s-sett tal-ħiliet, allura għandu jkun hemm qbil sew mill-perspettiva tal-mentee.

L-appoġġ ikopri l-istrutturi tal-intervisti, it-tekniki użati fil-mistoqsijiet, x’qed ifittxu l-impjegaturi, kif tikteb CV u ittra ta’ akkumpanjament, il-lingwa li n-negozju juża u r-ritmu tal-laqgħat. Xi drabi, hekk kif il-konverżazzjoni tevolvi, l-istudenti jsiru konxji ta’ xi wħud mis-saħħiet u d-dgħufijiet tagħhom u dan jgħinhom biex jifhmu liema rwoli jistgħu jkunu tajbin għalihom.

Minbarra li tgħin b’elementi aktar prattiċi bħas-CVs u t-tħejjija għal intervista, inti tipprovdi wkoll lill-istudenti tiegħek b’appoġġ emozzjonali. Tista’ tgħidilna aktar dwar dan?

Dan huwa fejn ir-relazzjoni tirnexxi jew tfalli. Din mhijiex konoxxenza każwali. Qiegħed tikkollabora b’objettiv wieħed: li tipprepara lill-istudent għad-dinja tax-xogħol. Dan jeħtieġ l-impenn miż-żewġ naħat. Bħal kwalunkwe relazzjoni oħra, huwa importanti li wieħed jifhem il-qafas tar-relazzjoni u li jiġu stabbiliti ċertu regoli u limiti.

L-istudenti huma mimlija dubji, imma minkejja dan jieħdu riskji li mhumiex kalkulati u huma kuraġġużi. Ħafna minnhom tgħallmu jqabblu l-prestazzjoni tagħhom ma’ dik tal-pari tagħhom minflok jiffurmaw l-istandards interni tagħhom stess. L-għajnuna biex ma jagħtux każ aktar l-aspettattivi tal-oħrajn u biex jistabbilixxu aspettattivi realistiċi għalihom infushom hija kritika.

Skoprejt li din hija l-pedament biex wieħed jibni l-fiduċja fih innifsu. Meta tasal għad-deċiżjonijiet tiegħek dwar il-futur tiegħek minflok ma toqgħod tipprova tilħaq l-aspettattivi tal-oħrajn, inti tafferma li dak li trid huwa importanti. Inti importanti. Tfittex ukoll fik innifsek biex issib it-tweġibiet, u meta ssibhom, temmen fl-abbiltà tiegħek li tibni l-futur tiegħek.

L-istudenti jistgħu, u infatti jagħmlu dan il-vjaġġ għalihom infushom; ir-rwol ta’ mentor huwa fil-biċċa l-kbira gwida biex turihom it-triq.  Għalija, din ir-realizzazzjoni matul il-vjaġġ tagħhom hija dak li tagħmel din l-esperjenza waħda ta’ tkabbir.

In-naħa l-oħra tad-dinja kummerċjali hija ovvjament l-impjegaturi. Kif taħseb li l-kumpaniji jistgħu jagħmlu lilhom infushom aktar attraenti għaż-żgħażagħ?

Jistgħu juru li huma impenjati għad-diversità u l-inklużjoni, ir-responsabbiltà korporattiva, l-ambjent u s-saħħa mentali tal-impjegati tagħhom. Nirrakkomanda li jinħolqu vidjows ta’ intervisti ma’ gradwati reali li huma impjegati apprezzati biex juru kif irnexxielhom jegħlbu l-isfidi tagħhom u marru tajjeb fil-kumpanija.

Id-dinja tax-xogħol qed tinbidel b’ritmu mgħaġġel. Kif taħseb li dan qed jaffettwa l-istudenti, l-abbiltà tagħhom li jsibu xogħol u l-abbiltà tagħhom li jadattaw għal ambjenti ġodda tax-xogħol?

Mhux faċli meta ma jkollhom l-ebda esperjenza f’ambjenti tax-xogħol. Madankollu, l-aħbar it-tajba hija li l-impjegaturi qed jibdew jirrikonoxxu li r-reklutaġġ abbażi tal-esperjenza biss mhux se jibqa’ jkun utli għalihom hekk kif resqin lejn ir-raba’ era industrijali.

It-tagħlim awtomatiku, l-intelliġenza artifiċjali u l-awtomatizzazzjoni qed ibiddlu b’ritmu mgħaġġel il-kriterji li l-impjegaturi jużaw meta jkunu qed ifittxu t-talent. Il-ħiliet li wieħed isolvi l-problemi, ir-reżiljenza u l-kreattività qed isiru dejjem aktar ta’ valur fuq il-post tax-xogħol, u l-ħiliet soċjali tagħna qed isiru wkoll dejjem aktar evidenti. Il-biċċa l-kbira tal-ħin tagħna se jitqatta’ f’timijiet żgħar li jfittxu li jkollhom interfaċċa mat-teknoloġija sabiex jiksbu l-aħjar eżiti. Li tkun uman se ssir metrika li l-impjegaturi se jirnexxilhom ikejlu.

Jeħtieġ li niżguraw li nkunu adattabbli u miftuħa għat-tagħlim. Dan iwassal biex l-istudenti jkunu f’pożizzjoni tajba peress li jkollhom l-ħiliet li jitgħallmu u d-dispożizzjoni biex jikbru. Se jkollhom bżonn jiżviluppaw passjoni u impenn għat-tagħlim tul il-ħajja, kif ukoll japplikaw tagħlim ġdid fuq ix-xogħol, sabiex jgħinu lin-negozji li jaħdmu magħhom biex ikunu kemm jista’ jkun flessibbli.

U fl-aħħar nett, x’inhi l-aħjar ħaġa dwar ir-rwol tiegħek bħala mentor fil-qasam tal-karrieri?

Li nara lin-nies jiftħu l-ġwienaħ. Li nara lin-nies jikbru hija waħda mill-akbar rigali tal-ħajja. L-impatt li jista’ jkollok fuq il-kunfidenza, il-mod ta’ kif wieħed jaħseb, il-limiti, l-indipendenza tal-ħsieb u l-kreattività huwa immens. Tista’ tagħmel differenza ta’ veru u hija wkoll xi ħaġa reċiproka. Ksibt għarfien tajjeb ta’ stili differenti ta’ ħidma, kif ukoll fehim aħjar tal-isfidi li t-talenti żgħażagħ tagħna qed jiffaċċjaw.

Links relatati:

University of Nottingham

University of Nottingham – Career Mentoring

Aqra aktar:

Jiem Ewropej tal-Impjiegi

Drop’pin@EURES

Sib il-Persunal tal-EURES..

Kundizzjonijiet tax-xogħol u l-għajxien fil-pajjiżi tal-EURES

Il-Bażi tad-Data tal-Impjiegi tal-EURES

Is-servizzi tal-EURES għall-impjegaturi

Il-Kalendarju tal-Avvenimenti tal-EURES

Avvenimenti Onlineli ġejjin

L-EURES fuq Facebook

L-EURES fuq Twitter

L-EURES fuq LinkedIn