„Besta valið“: Giorgio segir okkur frá reynslu sinni af EURES

Við heyrðum fyrst af sögu Giorgio þegar ítalski EURES-ráðgjafinn, Stefania Garofalo, sagði okkur hana í myndviðtali (á ítölsku) sem þau tóku upp í sameiningu þegar Stefania heimsótti Holland árið 2018. Í myndbandinu segir Giorgio frá hinu hraða ferli sem leiddi til þess að hann fluttist búferlum nokkrum árum fyrr.

„Ég átti flug um kvöld og næsta morgun var ég mættur á skrifstofuna!“

Giorgio var á fullu í uppskeruvinnu á víngarði frænda síns þegar hann fékk símtal með atvinnutilboði í Hollandi. Síðan gerðist allt mjög hratt – 20 dögum seinna var Giorgio á leið í flug. „Ég átti flug um kvöld og næsta morgun klukkan 9 var ég mættur á skrifstofuna!“ minnist hann í myndbandinu.

Með hjálp Stefaniu fann Giorgio starf hjá Aqua Vision BV, ráðgjafafyrirtæki á sviði sjómælinga í Utrecht en hann sótti um starf sem einn af hollensku samstarfsmönnum Stefaniu hafði auglýst.

„Giorgio fann starfið á EURES-vefgáttinni,“ útskýrir Stefania í myndbandinu. Síðan var ferlið mjög einfalt: „Hann sannfærðist af því sem hann las svo hann ákvað að sækja um. Fyrirtækið valdi hann og hringdi í hann.“

Þegar þau ræða um lífið og vinnuna segir Giorgio að honum líði vel í Hollandi þó að hann viðurkenni að miðað við Ítalíu sé hollenska veðrið ekki einn af kostunum. Stefania grínast líka með að hann hafi greinilega æft tungumálakunnáttu sína í vinnunni – svo mikið að hann er alltaf að skipta úr ítölsku yfir á ensku í samtalinu!

„Maður þroskast“

Eftir að Stefania deildi myndbandinu höfðum við samband við Giorgio til að fá meiri upplýsingar um bakgrunn hans og hvað hann hefði verið að gera síðustu tvö ár frá því að myndbandið var tekið upp.

Giorgio er nú 31 ár gamall og býr enn í Hollandi þó að hann hafi nýlega hafið störf sem rafmagnsverkfræðingur hjá Sjó- og loftrannsóknarstofnuninni við háskólann í Utrecht. Þegar hann hugsar til baka um flutningana fyrir meira en fimm árum síðan segir Giorgio „ákvörðunin um að flytja var besta ákvörðunin sem ég gat tekið“.

Þó að Giorgio hafi þegar þekkt vel til í Hollandi – hann tók þátt í menningarskiptum þegar hann var 19 ára og heimsótti landið margoft eftir það – var flutningurinn þangað stórt skref.

Hann óx upp í sveitaþorpi í héraðinu Treviso á Norður-Ítalíu þar sem fjölskyldan hans á lítinn sveitabæ og víngarð. Þrátt fyrir að hafa lært rafmagnsverkfræði við háskólann í Udine var eina starfsreynsla hans fyrir flutningana til Hollands á sveitabæ fjölskyldunnar. „Í uppvexti mínum kynntist ég erfiðisvinnu,“ segir hann.

„Að vera fjarri fjölskyldu og þægindahringnum þínum, einn í erlendu landi, hjálpar til við að kalla fram hliðar sem þú vissir jafnvel ekki að þú hefðir,“ segir Giorgio. „Það þroskar mann því maður öðlast nýja sýn. Ef ég ber sjálfan mig saman við einstaklinginn, sem ég var, átta ég á mig á því hversu mikið ég hef breyst.“

Þó að hann langi að flytja heim í sveitasæluna á Ítalíu dag einn segir Giorgio að hann sé hamingjusamur eins og er og leggi áherslu á að öðlast dýrmæta reynslu. „Eins og er ætla ég að dveljast hér í Hollandi og þroskast, læra og mynda mér dýrmæta þekkingu í eins mörgum atvinnugeirum og ég get.“

 

Tengdir hlekkir:

EURES-vefgáttin

Myndviðtal (á ítölsku)

 

Nánari upplýsingar:

Evrópskir atvinnudagar

Drop’pin@EURES

Finna EURES-ráðgjafa

Atvinnu- og búsetuskilyrði í EURES-löndum

Vinnugagnagrunnur EURES

Þjónusta EURES fyrir vinnuveitendur

Viðburðadagatal EURES

Næstu viðburðir á Netinu

EURES á Facebook

EURES á Twitter

EURES á LinkedIn